Ղարաբաղյան պատերազմի ժամանակ անհետ կորած մարտիկների մայրերը այսօր վստահ են՝ պատերազմ լինելու դեպքում հաղթանակը մերն է լինելու: Իրենք կգնան կկանգնեն տղամարդկանց կողքին:
«Անկասկած, տարածաշրջանում մեր բանակն ամենահզորն է, դա բոլորը գիտեն, գիտի նաև մեր հակառակորդը: Եթե չիմանար, նա շատ վաղուց էր հարձակվել մեզ վրա: Այդ է պատճառը, որ դեռ ուզում է փորձել, ինտրիգներ անել, բայց չի ստացվի: Ես՝ որպես ազատամարտիկի մայր, կարծում եմ, մեր տղաները զոհվեցին մեկ նպատակի համար՝ հայրենիքի: Իմ տղան ուներ ամեն ինչ, բայց չուներ հայրենիք»,- «Առաջին լրատվական»-ի հետ զրույցում նշեց «Անհետ կորած ազատամարտիկների մայրերի խորհուրդ» ՀԿ նախագահ, անհետ կորած ազատամարտիկ Շահեն Առաքելյանի մայրը՝ Ռիմա Առաքելյանը:
Նա հիացած է սահմանին կանգնած մեր երիտասարդների պայքարով, ովքեր այս օրերին մարտնչում են։
«Ես մասնակցեցի Ազատ Ասոյանի թաղման արարողությանը Եռաբլուրում, մայրն ասում էր՝ լավ է արել իմ տղան, չի թողել թշնամուն առաջխաղացում: Նրանք հասկանում են, որ իրենց տղան զոհվել է հանուն գաղափարի, հանուն այն հայրենիքի, որի մեջքն ամուր պահելու համար այսօր այստեղ չեն մեր որդիները»,- ասաց Ռիմա Առաքելյանը:
Նրա խոսքով՝ թշնամին հասկանում է, որ մենք Անդրանիկներ ենք: Ու թեև մենք խաղաղ գործում ենք մեզ համար, ապրում, բայց երբ մեր երկրին վտանգ է սպառնում, տեսնում ենք՝ ինչպես մեր Հայաստանը, Արցախը, աշխարհասփյուռ հայությունը միասնական մեկ գաղափարի շուրջ համախմբվում են և այդ միասնականության շնորհիվ է, որ հաղթում ենք և այսօր էլ պետք է հաղթենք.
«Իսկ եթե Ալիև ցարը փարձի սկսել պատերազմ, ապա այնպիսի զարկ կտանք նրա գահին, որ խորտակվի նա հիմնովին»,- ասաց տիկին Ռիման:
Կանայք նշեցին, որ իրենք էլ կգնան, մարտի ճանապարհելուց առաջ կաղոթեն, կերակուր կպատրաստեն, ամեն ինչ կանեն որպես առաջին քրիստոնյաներ:
Անհետ կորած ազատամարտիկ Գագիկ Չանախչյանի կնոջ՝ Գայանե Ավետիսյանի խոսքով՝ կա մեծ հայրենասիրություն, մեծ քաջ տղաներ, կանայք և մայրեր ունենք, որ լեցուն են ոգով և դիմակայում են հարվածին, և այս հարվածին էլ կդիմանանք, և հերոս ազգ ենք, սրանից էլ հերոսաբար դուրս կգանք:
Անհետ կորած «Արաբո» ջոկատի մարտիկ Արթուր Ղարիբյանի մայրը՝ Ալվարդ Ղարիբյանը, հետևում է լրատվությանը, ոգևորվում մեր հաջողություններով:
«Լսեցի, որ պաշտպանության նախարարը գնացել է դիրքեր, մնացել մեկ օր զինվորների կողքին, ինքը թեժ կետում եղել է զինվորների կողքին, նախարարը կայուն իր զինվորների կողքին աջակցում է ամեն ինչով: Տղաներին ոգին է առաջ մղում, որ կարողանում ենք շատ բաներ հաղթահարել»,- ասաց նա:
Նա վստահ է, որ պատերազմ լինելու դեպքում մենք կհաղթենք, եթե պետք լինի՝ մայրերով պատրաստ ենք գնալ հայրենիքին աջակցելու, եթե հայրենիքի համար է, պետք է ծառայեն, կռվեն, զոհվեն:
Անհետ կորած Ռուդիկ Գևորգյանի կինը՝ Ալվարդ Սահակյանը, որը 1992 թվականից առայսօր չի կորցնում իր հույսը, որ ամուսինը վերադառնալու է, «Առաջին լրատվական»-ի հետ զրույցում նշեց, որ իր ամուսնու համար հայրենիքն ավելի կարևոր էր. «Ոչ կին, ոչ մայր, պետք է գնանք, հանուն հայրենիքի է արել ամեն բան…»:
Ավելին՝ տեսանյութում:
