Ռուս-ուկրաինական ճգնաժամն արդեն անդրադարձել է եվրոգոտու տնտեսության վրա: Այս մասին գրում է The Financial Times-ը՝ հղում անելով մի շարք եվրոպական ընկերությունների: Նման նախազգուշացում է հայտնվել ԵՄ-ի կողմից Մոսկվայի դեմ միջոցառումների վերջին խստացման ֆոնին՝ նշում է թերթը: Այսօրվանից ուժի մեջ են մտնում Ռուսաստանի դեմ ԵՄ ոլորտային պատժամիջոցները:
Մասնավորապես, Adidas-ի բաժնետոմսերի արժեքն ընկել է 15 տոկոսով՝ ընկերության կողմից շահույթի նվազեցման և Ռուսաստանում իր մի շարք խանութների փակումն արագացնելու մասին նախազգուշացումից հետո: Իր հերթին Volkswagen-ը հայտնել է 2014-ի առաջին կեսին, 2013-ի նույն ժամանակահատվածի համեմատ, ռուսական վաճառքի 8 տոկոսով նվազման մասին:
Siemens-ի ղեկավարությունը նախազգուշացրել է, որ աշխարհաքաղաքական լարվածությունը լուրջ սպառնալիք է 2014 և 2015թթ. եվրոպական աճի համար: Բացի այդ, Metro ռիթեյլերը հայտարարել է, որ իրադարձությունները Ռուսաստանում ռիսկեր են ստեղծում ընկերության համար, և որ վաճառքն Ուկրաինայում կտրուկ ընկել է:
Royal Dutch Shell-ում նշել են, որ Արևմուտքի այլ խոշոր նավթային ընկերությունների հետ իրենք գնահատում են ռուսական էներգետիկ ոլորտի դեմ պատժամիջոցների խստացման հետևանքները: Erste Group-ը կարծում է, որ ճգնաժամը կարող է անդրադառնալ Արևելյան Եվրոպայի բանկերի վրա:
Ինչպես արդեն հաղորդվել է՝ ԵՄ անդամ 28 պետություններից ու ԱՄՆ-ից հետո Ռուսաստանի դեմ սահմանափակող միջոցառումները ծրագրում են ընդլայնել Նորվեգիան, Ճապոնիան և Շվեյցարիան: Վաշինգտոնը կոչ է արել ասիական երկրերին՝ Չինաստանին, Հարավային Կորեային և Սինգապուրին, միանալ Մոսկվայի նկատմամբ ճնշմանը:
