«Վերջին կիսամյակում, նախորդ տարվա նույն ժամանակահատվածի համեմատ, անչափահասների մասնակցությամբ հանցագործությունների թիվը նվազել է՝ 212-ից դառնալով 180»,- այսօր լրագրողների հետ հանդիպմանը ասաց Ոստիկանության ՔՀԳՎ 3-րդ վարչության պետ, ոստիկանության գնդապետ Նելլի Դուրյանը՝ հավելելով, որ հանցագործություն կատարած անձանց քանակը եղել է 180, հիմա դարձել է 160:
«Գրանցվել է սպանության՝ 1 և անչափահասի նկատմամբ թրաֆիքինգի ևս մեկ դեպք, ընդ որում՝ աշխատանքային, սեռական բնույթի թրաֆիքինգի դեպք չի հայտնաբերվել»,- ասաց Նելլի Դուրյանը:
Նվազել են նաև դպրոցներում ու դրանց հարակից տարածքներում թմրամիջոց օգտագործելու, խուլիգանության, մարմնական վնասվածք հասցնելու դեպքերը, փոխարենը ավելացել է ապօրինի զենք պահելու դեպքերը՝ նախորդ տարվա 3-ի փոխարեն արձանագրվել է 7 դեպք:
Կատարված հանցագործություններից առաջին տեղում գողություններն են և մարմնական վնասվածքները:
Նելլի Դուրյանը շեշտեց, որ անչափահասների մոտ կրկնահանցագործություններ չեն նկատվել: Այս պահին անչափահասների քրեակատարողական հիմնարկում գտնվում է 10 անձ, այդ թվում նաև՝ նախորդ տարիներին հանցագործություն կատարածները:
Նելլի Դուրյանը ընդգծեց, որ աշխատում են նաև երիտասարդների հետ, բացի դպրոցներից՝ այցելում են նաև բուհեր և կատարում հոգեբանական աշխատանքներ: