Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում հուլիսի 16-ին Շանթի և ընկերների գործով դատավարությանը ներկա է ԱԺ ՀԱԿ խմբակցության պատգամավոր Նիկոլ Փաշինյանը: Լրագրողների հետ զրույցում նա ասաց, որ իր պարտքն է համարել լինել այստեղ, և դրա մեջ առանձնապես մեծ իրադարձություն չի տեսնում:
«ՔԿՀ-ներում էլ այցելել եմ Շանթին և ընկերներին, հանդիպել եմ, զրուցել: Իմ ներկայությունը որևէ դատավարական գործողության հետ կապ չունի, որովհետև ես Մնացական Մարտիրոսյանի և իր նման դատավորների վարած դատավարական գործողություններին, անկեղծ ասած, լուրջ չեմ վերաբերվում, որ իմ այցելությունը կապված լինի դրանց հետ»,- ասաց նա:
Հարցին ի պատասխան՝ ինչո՞ւ ուրիշ պատգամավորներ չեն գալիս այս նիստերին, Փաշինյանը նշեց, թե մեկնաբանություն չունի: Պատգամավորին հիշեցրինք՝ Շանթի հայրը՝ Շահեն Հարությունյանը, կարծիք հայտնեց, թե ձգձգում են, վճիռը չեն հրապարակում, թեպետ արդեն որոշված է ներսում: Պատգամավորն ասաց. «Գիտեք, ըստ էության, մենք մոտավորապես գիտենք՝ ինչ դատավճիռ է լինելու, ձգձգելը կարող է կապված լինել նրա հետ, որ Սերժ Սարգսյանը Լատինական Ամերիկայում է կամ գուցե հիմա էլ Բադեն-Բադեն գնալու գործ ունի: Ես, անկեղծ ասած, մեծ տարբերություն չեմ տեսնում արագության և ելքի միջև: Գուցե Մնացական Մարտիրոսյանը պետք է փորձի երկու ամիս իմանալ Սերժ Սարգսյանի կարծիքը, հրահանգները, ժամանակ կարող է ծախսվել: Չեմ բացառում, որ էդպիսի տեխնիկական խնդիր լինի»:
Հարցին՝ հանրային մեծ ուշադրությունը որևէ կերպ չի՞ կարող ազդել արդար դատավճռի կայացման վրա, Փաշինյանը նշեց, թե եթե էդպես լիներ, Հայաստանում կոռուպցիա չէր լինի, որովհետև կոռուպցիոն բոլոր դեպքերը հանրային մեծ ուշադրության ներքո են, բայց ինչպես տեսնում ենք՝ կոռուպցիան առանձնապես չի նվազում: «Խնդիրն այն է, որ հանրային ուշադրությունը կարևոր հանգամանք է, պարզապես պետք է փորձենք դա տրանսֆորմացնել, վերածել կոնկրետ քաղաքական արդյունքների, ինչը, ցավոք, առայժմ չի ստացվում»,- ասաց նա: