Ադրբեջանական դիպուկահարների դիրքավորումը Նախիջևանում և կրակոցները հայկական սահմանների ուղղությամբ Նախիջևանից, որի հարցում ԵԱՀԿ Մինսկի խումբը չունի որևէ մանդատ, շարունակում են անհանգստացնել ոչ միայն հայաստանաբնակ, այլև միջազգային հանրությանը: Չէ՞ որ Ադրբեջանը բազմիցս էր հայտարարել, որ իրենց նպատակը Իրիվանի խանության ազատագրումն էր, որի ամենահարմար ճանապարհը Նախիջևանն է:
Սա կարելի է համարել Ադրբեջանի կողմից բացված մի նոր ճակատ, քանի որ նախկինում այդ ուղղությունից հայկական դիրքերում մահվան ելքով միջադեպեր, կրակոցներ չեն եղել: Եթե հիշենք նաև, որ դեռևս ապրիլ ամսին Ադրբեջանի զինված ուժերը լայնամասշտաբ զինավարժություններ էին սկսել Նախիջևանի Ինքնավար Հանրապետությունում, հասկանալի կդառնա, որ այս կրակոցներին հնարավոր չէ վերաբերվել՝ որպես պատահականության:
«Առաջին լրատվական»-ի հետ զրույցում Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանն ասաց, որ նոր ճակատի բացումը նշանակում է, որ բոլոր ճակատներով է Ադրբեջանը սկսել ճնշումներ բանեցնել Հայաստանի նկատմամբ՝ հասկացնելով, որ ոչ միայն Ղարաբաղը, այլև Հայաստանն է Ադրբեջանի թիրախը, այսինքն՝ խնդիրը ոչ միայն Ղարաբաղն է։ Եվ եթե ադրբեջանցիները սկսել են գործողություններ, նշանակում է, որ կանաչ լույս ունեն նաև Մոսկվայից Հայաստանին փոքր-ինչ սադրելու համար: Նա նաև հիշեցրեց, որ Նախիջևանը հատուկ կարգավիճակ ունի. չի բացառվում, որ Թուրքիայի մատը խառը լինի այդ բախումներում:
«Ես կարծում եմ՝ քանի որ ԵԱՀԿ-ը չի կարող միջամտել այս հարցին, որովհետև ԵԱՀԿ-ն միայն Ղարաբաղի վերաբերյալ լիազորություններ ունի, Մինսկի խումբը մանդատ չունի Նախիջևանի հարցում, ոչ մի փաստաթղթում Նախիջևանի մասին խոսք չկա, Հայաստանն իրավունք ունի դիմելու ՄԱԿ-ի Անվտանգության խորհուրդ, և միջազգային համայնքը պետք է ճշտի իր կեցվածքը դրա վերաբերյալ:
Ամեն ինչ կախված է նրանից, թե Հայաստանն ինչպես կարձագանքի. եթե Հայաստանը քաղաքական և դիվանագիտական պատասխան տա՝ պատասխանատու կեցվածք կդրսևորի, եթե կոշտ, ավելի զորավոր պատասխան տա, ապա դա Հայաստանի ՊՆ-ն պետք է անի։ Քանի որ առաջին անգամ է, որ նման բախում տեղի ունեցավ Նախիջևանի սահմանի վրա, կարծում եմ, որ հանգրվանից հանգրվան, վստահաբար, Հայաստանը պետք է պատասխանի, կարող է լինել նաև ռազմական պատասխան, բայց դա ՀՀ իշխանությունների որոշելիքն է: ՀՀ-ն կարող է դիմել նաև ՀԱՊԿ-ին, քանի որ հարվածն ուղղված է Հայաստանին: Ամեն դեպքում, պետք է զգույշ լինել, քանի որ առաջին անգամ են Նախիջևանի հատվածում կրակոցներ հնչում»,- մեկնաբանեց Կայծ Մինասյանը՝ հավելելով, որ պետք է միջազգայնացնել այս հարցը: