Քրդական Firat լրատվական գործակալության փոխանցմամբ, Թուրքիայում գրանցվել է խոսքի ազատության ու մարդու իրավունքների հերթական աղմկահարույց խախտումը: Մասնավորապես` այսօր Ստամբուլի 10-րդ` ծանր հանցագործությունների դատարանը 15-ամսյա ազատազրկման է դատապարտել «Քրդստանի համայնքների միության (KCK) դատավարությունը. գլոբալ պետություն և առանց պետության քրդեր» գրքի հեղինակ Մեհմեթ Գյուլերին, իսկ «Բելգե» հրատարակչատան սեփականատեր Ռագըփ Զարաքօլուի հանդեպ սահմանել է 16.000 թուրքական լիրա (10.000 ամերիկյան դոլար) տուգանք: Նրանցից առաջինը մեղադրվել է «ահաբեկչական կազմակերպության օգտին քարոզչություն կատարելու» մեջ, իսկ երկրորդը` «կազմակերպությունների հաղորդումների տպագրման կամ տարածման» մեջ:
Մասնավորապես` Գյուլերի գրքի 10-րդ էջում նշված է, որ Թուրքիայում արգելված Քրդստանի աշխատավորական կուսակցությունը (PKK) ճիշտ չի ընկալվում, և որ առանց նրա անհնարին կլինի քրդական հարցի լուծումը:
Հիշեցնենք, որ ներկայումս Դիարբեքիրի դատարանում ընթանում է Թուրքիայում արգելված PKK-ին աջակցելու մեղադրանքով հարուցված ամենազանգվածային դատական գործընթացը, որում հայտնվել է PKK քաղաքական կառույց հանդիսացող KCK 151 ներկայացուցիչ:
Ինչ վերաբերում է թուրք հրատարակիչ և մարդու իրավունքների պաշտպան Ռագըփ Զարաքօլուին, ապա վերջինս փետրվարի 15-ին Հայաստանի Ազգային գրադարանում պարգևատրվեց հայ առաջին տպագրիչ Հակոբ Մեղապարտի անվան մեդալով, ապա հայտարարեց, որ եթե Թուրքիան ճանաչի Հայոց ցեղասպանությունը, ապա դա ոչ միայն չի նվաստացնի նրան, այլ առավել վեհ կդարձնի: