Թուրքական Haberler.Com կայքի փոխանցմամբ՝ Թուրքիայի զինված ուժերի Գլխավոր շտաբի պետ, բանակի գեներալ Նեջդեթ Օզելը, ով քրդերի դեմ քիմիական զենք կիրառելու համար հայտնի է «քիմիական Նեջդեթ» մականունով, այսօր քննադատել է մի շարք լրատվամիջոցների՝ նրանց մեղադրելով Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) օգտին «քարոզչություն կատարելու» մեջ:
Դրա պատճառն այն է, որ Հաքքարիում S-70 Sikorsky տիպի ուղղաթիռի կործանումից հետո, որին զոհ գնաց 5 զինծառայող, թուրքական մի շարք լրատվամիջոցներ գրեցին, որ այն կործանել է PKK-ն՝ մանրամասնելով, որ ուղղաթիռը վայրէջք է կատարել PKK-ի ականապատած տարածքում:
Նեջդեթ Օզելն իր անհամաձայնությունն է հայտնել ուղղաթիռի կործանման տվյալ տարբերակին՝ պնդելով, թե ուղղաթիռը կործանման պատճառը տեխնիկական անսարքությունն է. «Մեր ուղղաթիռն ընկել է տեխնիկական անսարքության պատճառով: Հակառակ պնդումները համարում եմ ահաբեկչական կազմակերպության քարոզչություն: Ես քննադատում եմ այդպիսի լուրեր տարածողներին»:
