Մեքսիկայում ավտոբուսային վթարը 26 մարդու կյանք է խլել: Արձակուրդի մեկնողներին տեղափոխող ավտոբուսն ուղևորվել է երկրի հյուսիսային Չիխուախուա նահանգից խաղաղօվկիանոսյան Ռինկո-դե-Գուայաբիտոս առողջարան: Ավտոբուսը դուրս է եկել ճանապարհի երթևեկելի մասից ու ընկել 100 մետրանոց կիրճը, որից հետո մի քանի անգամ շրջվել է:
Վթարի տեղի է ունեցել մայրաքաղաք Մեխիկոյից 750 կմ հյուսիս արևմուտք: 18 տուժածները գտնվում են ծանր վիճակում: Զոհվել են նաև վարորդը և 3 երեխաներ: Այս մասին հաղորդում է Lenta.ru-ն:
Վթարի պատճառը պաշտոնապես հաստատված չէ, սակայն ոստիկանությունը կասկածներ ունի, որ վարորդը կամ քնել է ղեկին, կամ գերազանցել արագությունը, ինչի հետևանքով կորցրել է մեքենայի կառավարումը:
Սա այս տարվա մարդատար ավտոբուսների արդեն 4-րդ լուրջ վթարն է Մեքսիկայում: Վերջին դեպքը 43 մարդու կյանք էր խլել: Այդ ժամանակ բեռնատարը մխրճվել էր ֆերմերների տեղափոխող ավտոբուսի մեջ:
Մեքսիկայի ճանապարհներին տարեկան 24 հազար մարդ է զոհվում` կրկնակի շատ, քան թմրակարտելների դեմ պայքարի արդյունքում:
