Դատելով հայաստանյան մամուլի տեղեկություններից` Գյումրիի քաղաքապետի ընտրությանը հնարավոր է` արձանագրվի բավականին հետաքրքրական ներիշխանական մի կոմբինացիա, որը կարող է զգալիորեն կանխորոշել ապագա նախագահական ընտրությունների ընթացքը:
Խոսքն այն մասին է, որ Սերժ Սարգսյանը կարող է ՀՀԿ-ական ներկայիս քաղաքապետ Վարդան Ղուկասյանի փոխարեն Գյումրիի քաղաքապետի պաշտոնը, այսպես ասած, թողնել ԲՀԿ-ական Սամվել Բալասանյանին: Առավել ևս, որ կա Վարդան Ղուկասյանից ձերբազատվելու թե՛ անհրաժեշտ պատճառ, թե՛ հիմք:
Պատճառը առաջին հերթին այն է, որ Ղուկասյանը վաղուց ի վեր դարձել է բավական բացասական կերպար, և նրանից Գյումրիի ազատվելն ու նրան, այսպես ասած, հետին պլան մղելը կարող է դրական ծառայել Սերժ Սարգսյանի քարոզչությանը, իսկ հիմքն այն է, որ խորհրդարանական ընտրությանը ՀՀԿ-ն Գյումրիում բոլոր առումներով պարտվեց ԲՀԿ-ին, ինչին ի պատասխան` Սերժ Սարգսյանը կարող է Վարդան Ղուկասյանից պահանջել հեռանալ:
Ինչ վերաբերում է Սամվել Բալասանյանին, ապա այստեղ բավական հետաքրքիր վիճակ է: Բալասանյանը ԲՀԿ-ից է, բայց պետք չէ մոռանալ, որ նրա ճակատին ՕԵԿ է գրված, և նա դեռ չի հերքել իր ճակատի այդ գրությունը: Իսկ ՕԵԿ-ի ճակատին, ինչպես հայտնի է, գրված է ՀՀԿ: Այսինքն` ըստ էության կարելի է ասել, որ Բալասանյանի կուսակցական տոմսի մեջ ԲՀԿ է գրված, բայց ճակատին գրված է ՀՀԿ: Եթե լուրջ, ապա գործարար, գարեջրագործ Բալասանյանը պատկանում է ԲՀԿ-ի, այսպես ասած, զուսպ, հարմարվող թևին կամ ավելի ճիշտ՝ չի պատկանում ԲՀԿ-ի քոչարյանական թևին: Իսկ դա նշանակում է, որ Սերժ Սարգսյանը կարող է նրան Գյումրիի քաղաքապետ դարձնելով ոչ միայն նպաստել իր իմիջին՝ ձերբազատվելով և Գյումրին էլ ձերբազատելով Վարդան Ղուկասյանից, այլ նաև միաժամանակ իր կողմը գրավել կամ սիրաշահել ԲՀԿ-ի ոչ քոչարյանական թևին` այդպիսով նախագահական ընտրություններից առաջ Ռոբերտ Քոչարյանի և նրա թիմակիցների համար բարդացնելով ԲՀԿ յուրացումը: Իսկ որ Քոչարյանն իր թևի միջոցով կցանկանա ուժեղանալ ԲՀԿ-ում և արդեն իսկ նման փորձեր անում է` սկսած խորհրդարանական ընտրություններից, անկասկած է և նույնիսկ ակնհայտ:
Ակնհայտ է նաև, որ Գագիկ Ծառուկյանը երևի թե ստիպված կլինի կողմնորոշվել այն թևի օգտին, որն ավելի ուժեղ և ավելի ազդեցիկ կլինի կուսակցությունում: Այս իմաստով Գյումրիի քաղաքապետի ընտրությունը կարող է որոշակիորեն նախանշել զարգացումների միտում, որից հնարավոր կլինի նշմարել նախագահական ընտրություններից առաջ իշխանական համակարգի ներսում առկա պատկերը:
Ընդ որում, հատկանշական է, որ Գյումրիի քաղաքապետի ընտրությանը շոշափվում է նաև ԲՀԿ քոչարյանական թևի ներկայացուցչի անունը՝ Մարտուն Գրիգորյան, ով ժամանակին Սամվել Բաբայանի «Դաշինք» կուսակցության թեկնածուն էր: Իսկ թե ում «թեկնածուն» էր Սամվել Բաբայանը քաղաքական դաշտում` երևի թե ավելորդ է նշել: Այդ իմաստով անկասկած է նաև, որ Ռոբերտ Քոչարյանն էլ գիտակցում է Գյումրիի քաղաքապետի ընտրություններում իշխանական առերևույթ փոքր, բայց ներքին իմաստով բավական մեծ խաղի առկայությունը ու չի ցանկանում այդ խաղից դուրս մնալ:
