Փետրվարի 7-ին ճեպազրույց տալով լրագրողների համար և անդրադառնալով ԲՀԿ-ՀՀԿ հարաբերություններին՝ ԲՀԿ առաջնորդ Գագիկ Ծառուկյանի խնամի Հովիկ Աբրահամյանը հայտարարել էր, որ «Բարգավաճ Հայաստանը» սատարել է Սերժ Սարգսյանին 2008 թվականին և առաջիկայում էլ կձևակերպի իր դիրքորոշումն ու կհայտարարի սատարելու մասին:
Իսկ առաջիկայում ԲՀԿ համագումարն էր` փետրվարի 12-ին, որի ընթացքում Գագիկ Ծառուկյանը որևէ սատարման մասին չհայտարարեց: Փաստորեն, խնամի Հովիկը հուսախաբ, կամ իր իսկ բառապաշարով ասած` երազախաբ եղավ: Սա նշանակում է, որ Հովիկ Աբրահամյանը հայտնվեց բավականին ծանր մի իրավիճակում` խնամու և Սերժ Սարգսյանի միջև:
Ավելին՝ եթե նկատի ունենանք նաև այն, որ Գագիկ Ծառուկյանը բավական թափանցիկ կերպով ակնարկեց այն մասին, որ մի գեղեցիկ օր ԲՀԿ-ն կարող է գլխավորել նաև Ռոբերտ Քոչարյանը, ապա կարող ենք ասել, որ Հովիկ Աբրահամյանը փաստորեն մնում է ոչ թե իր խնամու և Սերժ Սարգսյանի, այլ Սերժ Սարգսյանի և Ռոբերտ Քոչարյանի արանքում:
Համաձայնեք, որ դա իսկապես շատ բարդ իրավիճակ է՝ հատկապես այն մարդու համար, որը քաղաքականության մեջ է առանց խելքի (ինքն էր խոստովանել, որ քաղաքականության մեջ իրեն խելք պետք չէ): Թեև գուցե նման դեպքերում բնազդը ավելի օգտակար լինի և օգնի ավելի ճիշտ ընտրություն կատարելու, քան խելքը:
Բայց որ Հովիկ Աբրահամյանի վիճակն աստիճանաբար աննախանձելի է դառնում և դառնում է նույնիսկ վտանգավոր՝ կարծես թե ակնհայտ է: Մինչդեռ, ընդամենը երկու տարի առաջ աշնանը դառնալով ԱԺ նախագահ, նա սկսել էր արդեն մտածել, որ Սերժ Սարգսյանի ժառանգորդն է, և հաջորդ աստիճանն արդեն ՀՀ նախագահի աթոռն է, որ սպասում է իրեն:
Հիմա պարզվում է, որ իրականում նախագահի այդ աթոռի համար Սերժ Սարգսյանն ու Ռոբերտ Քոչարյանն են մտել «մահացու» գոտեմարտի մեջ, և լավագույն ակնկալիքը, որ կարող է այդ ամենից ունենալ Հովիկ Աբրահամյանը, կա՛մ չճզմվելն է այդ գոտեմարտի արանքում, կա՛մ էլ ճզմվելու դեպքում գոնե շատ արագ և հնարավորինս քիչ ցավոտ ճզմումը:
Այդպիսով, ըստ էության ստացվում է, որ իշխանության մեջ և մասնավորապես ՀՀԿ-ում տեղի է ունենում կենտրոնների լուրջ վերադասավորում: Մասնավորապես Աբրահամյանի մասով. եթե նա մինչ այժմ դիտվում էր կենտրոններից մեկը, ում հարելու մասին մտածում էին շատ հանրապետականներ` ջրի վրա մնալու համար, ապա այսօր արդեն Աբրահամյանն ինքը ունի ջրի վրա մնալու խնդիր և որևէ մեկին հարելու անհրաժեշտություն:
Իսկ դա նշանակում է, որ ՀՀԿ-ում արդեն իսկ առաջանում է չկողմնորոշվածների կամ ապակողմնորոշվածների մի հսկա բանակ, որը շուտով ձեռնամուխ է լինելու վերակողմնորոշման գործընթացին:
