Грузия Online-ի փոխանցմամբ՝ այսօր լրացավ ընդդիմադիր միլիարդատեր, «Վրացական երազանք» կոալիցիայի առաջնորդ Բիձինա Իվանիշվիլիի կողմից տուգանքի վճարման ժամկետը, որը նրա նկատմամբ Վերահսկիչ պալատի ներկայացրած երկու հայցերի հիման վրա սահմանել էր Թբիլիսիի քաղաքային դատարանը:
Վերջինս Իվանիշվիլիին տուգանել էր 148,650,131 լարիով (մոտ 91 միլիոն դոլար), ապա Վերաքննիչ դատարանն այն կրկնակի կրճատել էր՝ թողնելով 74,325,065 լարի: Իվանիշվիլին տուգանվել էր մարդկանց քվեները գնելու փորձ կատարելու մեջ, ինչի համար Վրաստանի շրջաններում տեղակայել էր տվել 107,000 արբանյակային ալեահավաք, ինչպես նաև արտոնյալ պայմաններում 239 ավտոմեքենաներով սպասարկել էր ընդդիմության համակիրներին:
Իվանիշվիլիի փաստաբանները գտնում են, որ նա որևէ խախտում չի կատարել, իսկ դատարանի որոշումը պարզապես քաղաքական հետապնդում է: Նրանք մատնանշում են, որ Իվանիշվիլին որևէ կապ չունի Վերահսկիչ պալատի նշած ընկերությունների հետ: Իվանիշվիլին մտադիր է այդ գործում անգամ ներառել օտար փաստաբանների: Forbes-ը Իվանիշվիլիի ունեցվածքը գնահատում է 6.4 միլիարդ դոլար:
Այժմ՝ տուգանքի ժամկետի ավարտից հետո, Վերահսկիչ պալատը պետք է դիմի Ազգային կատարման բյուրո, որը հնգօրյա ժամկետում պետք է Իվանիշվիլիին իրազեկի տուգանքի հարկադիր ստացման միջոցների սկսման մասին: Դրանից մեկ շաբաթ անց, եթե Իվանիշվիլին շարունակի չվճարել տուգանքը, բյուրոն պետք է որոշի, թե ինչպես բռնագանձել այդ գումարը:
