Al-Jazeera հեռուստաընկերության հաղորդմամբ, Կահիրեում արդեն հավաքվել է 2 միլիոն մարդ, ինչն աննախադեպ երևույթ է վերջին 30-35 տարվա ընթացքում: Ուղիղ մեկ ժամ առաջ նրանց թիվը հասնում էր մեկ միլիոնի:
Հայտնի է, որ ռազմական ոստիկանությունը փշալարերով շրջափակել է նախագահական նստավայրի մատույցները: Զինվորականները ստուգում են Թահրիր հրապարակին մոտեցողներին:
Ցուցարարներն այստեղ են եկել իրենց երեխաների հետ՝ դրանով նշելով, որ ցույցը կրելու է խաղաղ բնույթ:
Ավելի վաղ Ալ-Բարադեին, որը հանդիսանում է եգիպտական ընդդիմության առաջնորդներից մեկը, հայտարարել է, որ արդեն եկել է ժամը, երբ Մուբարաքը պետք է հրաժարական տա և հեռանա երկրից: Al-Arabia ռադիոկայանին տված հարցազրույցում նա ասել է, որ Մուբարաքը ժամանակ ունի մինչև ուրբաթ, երբ ցուցարարները կազմակերպելու են վերջին ցույցը. այդ օրը անվանել են «հեռացման ուրբաթ»:
Եգիպտոսի երկրորդ քաղաքում` Ալեքսանդրիայում, հավաքվել է մի քանի հարյուր հազար մարդ: Նրանք նույնպես պահանջում են Մուբարաքի հրաժարականը: