Այսօր ԱԺ «Ժառանգություն» խմբակցության անդամ Զարուհի Փոստանջյանը լրագրողներին պատմեց անցյալ շաբաթ կայացած ԵԽԽՎ ձմեռային նստաշրջանում հայկական պատվիրակության տարած աշխատանքի մասին:
Զարուհի Փոստանջյանը այս նստաշրջանում ներկայացրել է երկու փաստաթուղթ. մեկը`Հայաստանում շահագործվող ածխահանքերի մասին, մյուսը` Լեռնային Ղարաբաղի անկախության ճանաչման մասին:
Անկախ ժողովրդավարական Լեռնային Ղարաբաղի մասին Զարուհի Փոստանջյանի ներկայացրած համաձայանագիրը ստորագրել են 22 երկրների ներկայացուցիչներ:
«Սա կարող է հիմք հանդիսանալ հետագայում պարտադիր փաստաթղթի ստորագրման համար»,- այս փաստը կարևորում է Փոստանջյանը:
Ի դեպ, ադրբեջանական պատվիրակությունը ևս ներկայացրել է նման հայտարարություն` Խոջալուի մասին, սակայն այդ փաստաթուղթը ստորագրել են ԵԽԽՎ շատ քիչ պատվիրակներ, և այն չի անցել ընդունման համար անհրաժեշտ 20 ստորագրության շեմը:
«Իհարկե, լավ է, որ բարձրաստիճան պաշտոնյաները ընդունում են, որ սա հայկական դիվանագիտության մեծ հաղթանակն է, բայց նրանք պետք է նշեն նաև` ովքեր են այս նախաձեռնության հեղինակները, և պետք է միանան մեզ, այլ ոչ թե խանգարեն»,- ասում է «Ժառանգություն» կուսակցության մամլո խոսնակ Հովսեփ Խուրշուդյանը:
