Թունիսյան մզկիթների մի շարք ռադիկալ տրամադրված իմամներ երիտասարդներին սկսել են կոչ անել մեկնել Սիրիա ` Բաշար Ասադի վարչակարգի դեմ ուղղված ջիհադի համար։ Այս մասին հաղորդում է Agence France-Presse-ը:
Պաշտոնական տվյալների համաձայն՝ Թունիսի մոտ 500 հազար մզկիթներից մոտ 400-ը գտնվում են ռադիկալ իսլամիստների կառավարման ներքո: Հենց այդ պաշտամունքային հաստատություններում էլ նման քարոզչություն է տարվում:
Կրոնի հարցերի նախարար Ահմեդ Բերգաուին հաստատել է նման խնդրի առկայությունը՝ ավելացնելով, որ կառավարությունն արդեն զբաղվում է խնդիրը լուծելու ճանապարհներ փնտրելով:
Թունիսի ՆԳՆ ղեկավար Ալի Լարայեդն իր հերթին հայտարարել է, որ նման բան հադիպել է նաև առաջ` երիտասարդ թունիսցիները մեկնում էին հարևան Լիբիա՝ Մուամար Քադաֆիի դեմ պատերազմելու համար:
«Մենք երիտասարդությանը փորձում ենք հետ պահել վատ արկածներից: Նրանցից ոմանք արդեն սպանվել են, ոմանց ձրբակալալ են, սակայն ովքեր մնացել են՝ շարունակում են պատերազմել Սիրիայում»,- հստակեցրել է նախարարը՝ հավելելով, որ իր գերատեսչությունը հետևում է իրավիճակին:
Մի շարք արաբական երկրներում որտեղ գերակշռում են սունիները, միահավատների` սիրիական ապստամբների պայքարը Բաշար Ասադի ալավիական /շիա/ վարչակարգի դեմ, ընկալվում է կրոնական հակամարտության պրիզմայով: Այդ իսկ պատճառով ռադիկալ իսլամի մի շարք հետնորդներ ուղևորվում են Սիրիա` իրենց պարտքը համարելով «պայքարել հանուն հավատքի»:
Ավելի վաղ ՄԱԿ-ում Սիրիայի դեսպան Բաշիր Ջաֆարին հայտարարել էր, որ իր երկրում գործում են «օտարազգի ահաբեկիչներ և վարձկաններ»` 26 երկրներից` Թունիս, Լիբիա, Պաղեստին և այլն: Ընդ որում՝ դիվանագետը հայտարարել էր, որ նրանցից շատերը կապ ունեն «Ալ-Կաիդա»–ի հետ: