«ժողովուրդ»-ի աղբյուրների փոխանցմամբ՝ ծանր իրավիճակում են հայտնվել իշխանական կուսակցությունների՝ ՀՀԿ, ԲՀԿ և ՕԵԿ «ընտրատեղամասային կուրատորները»:
«Սրանք այն մարդիկ են, որոնցից յուրաքանչյուրին իրենց թաղում վստահել են ընտրական պրոցեսը՝ հավաքագրել ձայներ, հավաքել մարդկանց անձնագրերը, նրանց բաժանել ընտրակաշառք, տանել տեղամաս ու հետևել քվեարկությանը: Նրանք տեղամասերում եղել են վստահված անձինք: Եվ հիմա, երբ պարզվել է, որ մի շարք ընտրատեղամասերում լուրջ անհամապատասխանություն կա բաժանված գումարի և դրա դիմաց ստացած ձայների միջև, հատկապես կուսակցությունները «կուրատորներից» պահանջում են հետ վերադարձնել գումարները՝ այլապես սպառնալով հաշվեհարդար տեսնել»:
Թերթի աղբյուրները պատմում են, որ նման պրոցես սկսվել է Երևանի բոլոր ընտրատարածքներում և հանրապետության խոշոր քաղաքներում:
«Արդյունքում «կուրատորները» սկսել են կրկին այցելել մարդկանց բնակարաններ, հավաստիանալ՝ իրոք քվեարկել են, ինչպես հարկն է: Նրանցից ոմանք նույնիսկ սկսել են մարդկանցից հետ ուզել գումարները և հիմա զբաղված են դրամահավաքչությամբ»: