«Նիսյա» առևտուրը թեև վերջին տարիներին մայրաքաղաքից դուրս է մղվել կամ փոխակերպվել, այսպես ասած, ապառիկի, որն առանձնապես քիչ է տարբերվում «նիսյայից», սակայն գյուղերում և մարզերում մարդիկ շարունակում են իրենց գոյությունը «նիսյա» համակարգի օգնությամբ պահպանել։ Օրինակ` Արմավիրի մարզի Բագարան գյուղի` ինչպես գյուղի բնակիչներն են կոչում` «կոմիսիոններում» փակցված է` «Նիսյա չկա» զգուշացումը։ Սակայն ամենահետաքրքիրն այն է, որ տվյալ կրպակներում լավ էլ «նիսյա կա», պարզապես այդ զգուշացումը վերաբերում է նրանց, ովքեր արդեն 300 հազար դրամի պարտք ունեն։
Այդպիսի կրպակներից մեկի սեփականատերը` տիկին Գոհարը, մեզ հետ զրույցում նշեց, որ գյուղացիները արդեն կոնկրետ իրենց «կոմիսիոնում» ընդհանուր առմամբ 5 միլոն դրամի պարտք ունեն, որը աստիճանաբար մարում են մրգի կամ բնամթերքի սեզոնին։
«Մարդկանց էլ մեղադրելու չէ. ձմեռը անգործությունից «նիսյայով» են ապրում, իսկ ամռան ու աշնան բարիքով ձմեռվա պարտքերն են մարում։ Չնայած բնության հետ անիմաստ է հույսեր կապել, քանի որ բնությունը սիրում է անակնկալներ մատուցել։ Օրինակ` անցյալ տարի մարդիկ 2 միլիոն պարտք այդպես էլ չկարողացան մարել»,- անկեղծացավ տիկին Գոհարը և ավելացրեց, որ իրենք ըմբռնումով են մոտենում գյուղի բնակիչներին։
Հարկ է նկատել, որ Բագարանում այդ սկզբունքով աշխատող 4 կրպակ կա։
