Հայաստանյան քաղաքական գործընթացների վրա արտաքին ազդեցություն, անշուշտ, կա. դրա վկայությունը միջազգային բազմաթիվ կառույցների հայտարարություններն են՝ կապված երկրում նոր որակի ընտրություններ անցկացնելու սպասելիքների հետ: «Առաջին լրատվական»-ի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը:
«Բնական է, որ նմանօրինակ հայտարարությունները բավական մեծ ազդեցություն են ունենում: Էլ չեմ ասում այն մասին, որ ընտրական գործընթացները վերահսկելու են բազմաթիվ արտասահմանցի դիտորդներ, նրանց կողմից տրվելու են գնահատականներ: Բնական է նաև, որ հայաստանյան ընտրությունները գտնվում են արտաքին կառույցների՝ ԵՄ-ի, ԵԽ-ի մշտական մոնիտորինգի ներքո: Վերջիններիս ազդեցությունն արտահայտվում է այդ կառույցների կողմից դիտորդական առաքելությունների, դրանց ընթացքում հնչող գնահատականների, աջակցության մասին խոստումների միջոցով»,- ասաց նա:
Հարցին՝ որո՞նք են հայաստանյան այն քաղաքական ուժերը, որոնք իրենց քաղաքական ապագան կապում են արտաքին այս կամ այն վեկտորի հետ, Մանվել Սարգսյանը նկատեց, որ կոնկրետ անուններ չի կարող նշել, սակայն ակնհայտ է, որ բոլոր կուսակցություններին էլ բնորոշ է արտաքին ուժերի աջակցություն ստանալուն ձգտելը:
