ՎիվաՍել-ՄՏՍ-ի և Վայրի բնության և մշակութային արժեքների պահպանման հիմնադրամի համատեղ ասուլիսին ներկայացվել են «Երկրի օր-2012» քարոզարշավի առանցքային ծրագրերը
ՎիվաՍել-ՄՏՍ-ը` «ՄՏՍ» ԲԲԸ դուստր ընկերությունը, տեղեկացնում է, որ համատեղ ասուլիսի ընթացքում ՎիվաՍել-ՄՏՍ-ի գլխավոր տնօրեն Ռալֆ Յիրիկյանը և Վայրի բնության և մշակութային արժեքների պահպանման հիմնադրամի տնօրեն Ռուբեն Խաչատրյանը ներկայացրել են «Երկրի օր-2012» քարոզարշավի առանցքային ծրագրերը և քարոզարշավի շրջանակում իրականացվող հիմնական միջոցառման` ծառատունկի մանրամասները:
Այս տարի նախատեսված մեծ ծառատունկը կիրականացվի Արարատի մարզի Ուրծաձոր համայնքում: Այստեղ է գտնվում «Խոսրովի անտառ» պետական արգելոցին կից բուֆերային գոտու այն հատվածը, որի պահպանությունը ստանձնել է Վայրի բնության և մշակութային արժեքների պահպանման հիմնադրամը: «Երկրի օր» քարոզարշավի շրջանակում այդ տարածքի ծառազուրկ հատվածում ապրիլի 22-ին նախատեսվում են անտառստեղծման աշխատանքներ իրականացնել:
«Հայաստանը փոքր երկիր է` սահմանափակ բնական ռեսուրսներով, և այդ սակավաթիվ ռեսուրսների պահպանությունը և ճիշտ տնօրինումը երկրի համար կենսական խնդիրներ են: Այդ պատճառով անհրաժեշտ է ընդունել, որ երկարաժամկետ կայուն զարգացմանն ուղղված որոշումների կայացման մեջ այսօրվա թերացումները գալիք տասնամյակներում բացասական ազդեցություն կունենան ապագա սերունդների կյանքի որակի վրա»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: «Բնապահպանական գործունեության մեջ կամավորական հիմունքներով ընկերությունների և անհատների մասնակցության խրախուսումը բնության հանդեպ խնամքով վերաբերմունք ձևավորելուն ուղղված առաջին քայլն է: Բնապահպանական կազմակերպությունները և կրթական ծրագրերը կարևոր դեր ունեն տարաբնույթ թիրախային խմբերի շրջանում բնապահպանական խնդիրները վերհանելու, հանրային իրազեկությունը բարձրացնելու, գիտելիքների տարածման և բնապահպանական գիտակցությունը խթանելու հարցում: ՎիվաՍել-ՄՏՍ-ը և Վայրի բնության և մշակութային արժեքների պահպանման հիմնադրամը համախմբվել են հանուն գալիք սերունդների ապագայի»,-ավելացրել է Ռալֆ Յիրիկյանը:
Ասուլիսի ընթացքում ամփոփվել են նաև «Երկրի օր» քարոզարշավի շրջանակներում հայտարարված «Դիմավորենք թռչուններին» խորագրով 2-րդ` կենդանաբանական այգում ձմեռող և բնադրող թռչունների մասին պատմող հեքիաթների մրցույթի արդյունքները: Ռուբեն Խաչատրյանն ու Ռալֆ Յիրիկյանը երեք անվանակարգերում հանրակրթական դպրոցի սաներին մրցանակներ են հանձնել:
