Ռուսական Regnum լրատվական գործակալության փոխանցմամբ՝ Ադրբեջանի ընդդիմադիր «Հասարակական պալատ» շարժումը դիմել է Բաքվի քաղաքապետարան՝ ապրիլի 22-ին հանրահավաք անցկացնելու համար: Այս մասին հայտարարել է ընդդիմադիր կառույցի մամուլի ծառայությունը:
Շարժումը քաղաքապետարանին առաջարկել է հանրահավաքն անցկացնել ապրիլի 22-ին՝ ժամը 16.00-18.00 ընկած ժամանակահատվածում, առաջարկելով Բաքվի մի շարք վայրեր, որոնք հարկ եղած դեպքում կփոխարինվեն նոր վայրերով:
Ակցիայի ժամանակ «Հասարակական պալատն» առաջ է քաշելու ժողովրդավարական բարեփոխումներ անցկացնելու հարցը: Ակցիան անցնելու է հետևյալ կարգախոսների ներքո. «Նոր խորհրդարանական ընտրություններ», «Ազատություն Ղարաբաղին», «Ազատություն քաղբանտարկյալներին», «Հետ վերադարձրեք ավանդները», «Ձեռք մի՛ տվեք մեր ունեցվածքին», «Ո՛չ կոռուպցիային ու կաշառակերությանը»:
Ակցիայի կազմակերպիչների կանխատեսմամբ՝ ակցիային մասնակցելու է 10,000 մարդ: Նշվում է, որ ապրիլի 8-ին Բաքվի ծայրամասում կազմակերպված ընդդիմության ցույցին մասնակցել էր մոտ 3000 մարդ:
Հիշեցնենք, որ «Հասարակական պալատ» քաղաքացիական շարժումը ձևավորվել է անցած տարվա դեկտեմբերի վերջին՝ ի պատասխան 2010 թվականի նոյեմբերի 7-ին Ադրբեջանում հերթական անգամ կեղծված (խորհրդարանական) ընտրությունների: Շարժմանն անդամակցում են ընդդիմադիր քաղաքական գործիչներ և հասարակական ակտիվիստներ:
