Վայոմինգ նախանգում գտնվող Բուֆորդ քաղաքն աճուրդում վաճառվել է 900 հազար դոլարով: Այս մասին հայնել է Associated Press գործակալությունը:
Երկու անհայտ վիետնամցիներ դարձել են բենզալցակայանի, խանութի, 1905թ. կառուցված դպրոցի շենքի, ավտոտնակի, երեք ննջասենյակներով առանձնատան ու 10 ակր հողատարածքի սեփականատերը:
Բուֆորդը հավակնում է ԱՄՆ ամենափոքր քաղաք կոչվելուն, քանի որ այնտեղ ապրում է ընդամենը մեկ մարդ:
Ինքնահռչակ քաղաքի քաղաքապետ Դոն Սեմոնսը, որը Բուֆորդ է եկել ավելի քան 30 տարի առաջ, որոշել է փոխել բնակության վայրը և ունեցվածքը հանել է աճուրդի:
Հիշեցնենք, որ նախնական արժեքը 100 հազար ամերիկյան դոլար էր:
Սեմոնսը Բուֆորդ քաղաքում անցկացրած տարիները անվանել է «հրաշալի ժամանակահատված» իր ու իր ընտանիքի համար, սակայն նկատել է, որ իր բոլոր հարազատները տեղափոխվել են բնակության այլ վայրեր, իսկ ինքը պետք է թոշակի անցնի:
Քաղաքը հիմնադրվել է 19-րդ դարավերջին: Մի ժամանակ այնտեղ բնակվում էր շուրջ 2000 մարդ, որոնք հետագայում իրենց բնակության վայրը փոխեցին: