Արտաքին գործերի նախարարությունը չպետք է Մադոննային Ռուսաստան մուտք գործելու արտոնագիր տրամադրի, քանի որ նրա համերգը` նվիրված Սանկտ Պետերբուրգի միասեռականների պաշտպանությանը, օրենսդրության խախտում է: Այս մասին հայտարարել է հայտնի միսիոներ, Մոսկվայի հոգևոր ակադեմիայի պրոֆեսոր Անդրեյ Կուրաևը:
Կուրաևի կարծիքով՝ համերգի կանխարգելման ամենահեշտ ձևը Հյուսիսային մայրաքաղաքի իշխանությունների դիմումն է ԱԳՆ–ին` Մադոննային և նրա անձնակազմին մուտքի արտոնագիր չտրամադրելու խնդրանքով, քանի որ նրա այցի նպատակն իր իսկ խոսքերով՝ «ռուսական օրենսդրության խախտումն է»:
RIA Novosti-ի փոխանցմամբ` Կուրաևը հասարակ քաղաքացիներին ևս կոչ է արել գործողություններ ձեռնարկել:
Նա ասել է, որ «այն իշխանությունը, որը օրենք է ընդունում և չի պատրաստվում դրան հետևել, նվազագույն հարգանքի անգամ աժանի չէ»:
Նշենք, որ նախօրեին երիտասարդների հետ հանդիպման ժամանակ Պետերբուրգի խորհրդարանի պատգամավոր Վիտալի Միլոնովը հարցրել էր հոգևորականին, թե ինչ պետք է անեն պետերբուրգցիները՝ կանխելու համար Մադոննայի օգոստոսյան համերգը: Կուրաևն առաջարկել էր զանգել Հետախուզության դաշնային բյուրո և ասել, որ համերգասրահում իբր թե ռումբ է տեղադրված: Սակայն այսօր նա հայտարարել է, որ իր այդ ասածը միայն կատակ է եղել:
