ԲՀԿ նոր անդամ Վարդան Օսկանյանը երեկ հայտարարել է, որ իշխող կոալիցիան ձևական է եղել և Հանրապետական կուսակցությունը միայնակ է կրում պատասխանատվությունը սոցիալ-տնտեսական ծանր իրավիճակի համար, քանի որ երբեք էլ չի զգացել ԲՀԿ-ի ձայների կարիքը: Վարդան Օսկանյանը նաև հայտարարել է, որ եթե ՀՀԿ-ն բացարձակ մեծամասնություն կազմի խորհրդարանում, ապա ինքը կպնդի, որպեսզի ԲՀԿ-ն կոալիցիա չկազմի ՀՀԿ-ի հետ:
Այսպիսով, նորընծա ԲՀԿ-ական Վարդան Օսկանյանը ժամանակի ընթացքում ավելի ու ավելի ակտիվ է դառնում, և ընդ որում` այդ ակտիվությունը նկատվում է ԲՀԿ-ի համար բավականին արմատական տոնայնություն պարունակող ընդդիմադիր շեշտադրումներով: Եվ այս ամենն, ըստ էության, կարող է երկու բան վկայել՝ կամ Բարգավաճ Հայաստանն իսկապես անցնում է կոշտ ընդդիմադիր տոնայնության, և այդ անցումը, այսպես ասած, համակարգում է Վարդան Օսկանյանը, կամ էլ Վարդան Օսկանյանը ԲՀԿ ներսում է որոշակի, այսպես ասած, առանձին կոշտ ընդդիմադիր թև փորձում ձևավորել, հետագայում այդ թևի դոմինանտության հասնելու համար: Համենայնդեպս, ակնհայտ նկատելի է, որ Վարդան Օսկանյանը դեռևս նախընտրական պաշտոնական քարոզարշավն իսկ չսկսած, ավելի ու ավելի մեծ հավակնություններ է դրսևորում ԲՀԿ-ում առաջատար դեր ստանձնելու համար, և դատելով ՀՀԿ արձագանքից` թերևս պետք է ասել, որ Հանրապետականի համար էլ այստեղ կան որոշակի անակնկալ երանգներ:
Մասնավորապես, ՀՀԿ խոսնակ Էդուարդ Շարմազանովը հայտարարել է, թե ինքը Բարգավաճի մասին ավելի մեծ կարծիքի է եղել, քան Օսկանյանը, քանի որ չի համարում, թե կոալիցիայում ԲՀԿ-ն զբաղված է եղել ձևականություններով: Այսինքն` ՀՀԿ-ն ըստ երևույթին փորձում է Գագիկ Ծառուկյանին ակնարկել, որ ավելի մեծ կարծիքի էին կուսակցությունում նրա դերի մասին: Այսինքն` հանրապետականներին դուր չեն գալիս ԲՀԿ-ում Վարդան Օսկանյանի բավական հավակնոտ հայտերը և ռեալ վտանգ են տեսնում, որ Բարգավաճ Հայաստանում իրավիճակի վերահսկողությունն ու թելադրանքը կարող է Վարդան Օսկանյանի ձեռքն անցնել: Այստեղ էլ, սակայն, ՀՀԿ համար երևի թե ինքնին ոչ այնքան Օսկանյանն է վտանգավոր, որքան այն, որ նրա հետևում կարող են տեսնել Ռոբերտ Քոչարյանին:
