Աշխատունակ մարդիկ, ովքեր մենակ են ապրում, դեպրեսիայի մեջ ընկնելու վտանգի առջև են կանգնած: Ֆինն մասնագետների խոսքերով՝ կյանքն ընտանիքում պաշտպանում է նման հոգեկան խանգարումներից։ Այս մասին գրում է Xinhua-ն:
Մասնագետների հաշվարկներով՝ միայնակ մարդիկ 80 %-ով ավելի հաճախ են հակադեպրեսանտներ ընդունում: Ընդ որում, որպես հիմնական գործոններ, գիտնականները կանանց համար նշում են կենցաղի վատ պայմանները, իսկ տղամարդկանց համար` սոցիալական աջակցության բացակայությունը:
Հետազոտության բոլոր մասնակիցներն աշխատողներ են եղել: Նրանցից 1695-ն ուժեղ սեռի ներկայացուցիչներն են եղել, իսկ 1776-ը` գեղեցիկ սեռի: Միջին տարիքը եղել է 44.6 տարեկան: Հետազոտության արդյունքները հրապարակվել են BioMed Central պարբերականում։
Աշխատանքի հիգիենայի ֆիննական ինստիտուտի աշխատակից, գիտական աշխատանքի ղեկավար դոկտոր Լաուրա Պուլկկի-Ռաբակը հավաստիացնում է, որ իրականում հոգեբանական խնդիրների զարգացման վտանգը միայնակ մարդկանց մոտ ավելի բարձր կարող է լինել:
Բանն այն է, որ հետազոտության մասնակիցներից մի քանիսը կրկնակի հետազոտություն չեն անցել, և դեպրեսիան կարող էր ավելի վատթարանալ: Համաձայն վիճակագրության` վերջին 30 տարվա ընթացքում միայնակ մարդկանց թիվը երկու անգամ աճել է: Հատկապես անհանգստացնող իրավիճակ է ԱՄՆ-ում և Մեծ Բրիտանիայում, որտեղ միայնակ է բնակիչների յուրաքանչյուր երրորդը:
