Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը «Առաջին լրատվական»-ի հետ զրույցում հավաստիացրեց, որ երեկվանից՝ ձյան տեղալու հետ համաժամանակյա, քաղաքապետարանի համապատասխան ստորաբաժանումները Երևանի փողոցներում մաքրման աշխատանքներ են սկսել, որոնք անհրաժեշտության դեպքում կշարունակվեն նաև այսօր:
«Այս գիշեր՝ երթևեկությունը թեթևանալուց հետո, փողոցների մաքրման աշխատանքները շարունակվել են»,- ասաց նա:
Դիտարկմանը, թե՝ Վարդանանց և Խանջյան փողոցների մայթերին, այնուամենայնիվ, չմաքրված ձյուն և սառույց կա, Արթուր Գևորգյանը նախ զարմացավ, իսկ հետո էլ խոստացավ օպերատիվ շտաբին հանձնարարել՝ նշված վայրերում իրականացնել մաքրման աշխատանքներ:
«Հավատացնում եմ, որ մաքրման աշխատանքներն արվում են ու կարվեն, ոչ մի խոչընդոտ չի լինի: Բայց նշված փողոցներում տնտեսվարող սուբյեկտներ էլ կան, չէ՞: Իրենց վարձակալության պահանջների համաձայն՝ նրանք պարտավոր են սեփական խանութների հարակից տարածքները բարեկարգել: Ես սա չեմ ասում պատասխանատվությունը մեր վրայից «գցելու» համար: Ուղղակի մենք պետք է այդ մարդկանց հասու դարձնենք, որ մենակ փող աշխատելով չէ»,- ասաց Գևորգյանը:
