Բրիտանացի գիտնականները եկել են այն եզրակացության, որ տարիքին զուգընթաց մարդիկ ավելի են երջանկանում: Չնայած միջին տարիքի սահմանը հատելու դեպքում առողջության հետ կապված խնդիրներ են առաջ գալիս, այնուամենայնիվ, երջանկության մակարդակը սկսում է կայուն կերպով աճել:
Ինչպես գրում է The Daily Mail-ը, Ուորվիկի համալսարանի գիտնականներն ուսումնասիրել են ԱՄՆ-ի և Մեծ Բրիտանիայի ավելի քան 10 հազար մարդկանց կենսակերպը և առողջությունը: Նրանց կյանքի որակը գնահատվել է տարբեր գործոններով՝ ներառյալ ընդհանուր առողջական վիճակի ընկալումը, ցավերի առկայությունը կամ բացակայությունը, սոցիալական կյանքը և հոգեկան առողջությունը: Արդյունքում հետազոտողները հանգել են այն եզրակացության, որ մարդկանց երջանկության զգացողությունը նման է պարաբոլի. Հասնելով իր նվազագույն կետին մոտ 45 տարեկանում՝ այն սկսում է աճել տարիքին զուգընթաց:
«Մեր ենթադրությամբ՝ դա պայմանավորված է այն հանգամանքով, որ տարիքի հետ մարդիկ սկսում են ավելի հեշտ տանել անախորժ իրավիճակները: Այսպիսի արդյունք էին ցույց տվել նաև նախորդ հետազոտությունները. րանց համաձայն՝ տարեց մարդիկ, ի տարբերությւոն երիտասարդների, ունեն պաշտպանիչ մեխանիզմներ, որոնք օգնում են նրանց հաղթահարել դժվարությունները և բացասական հանգամանքները,- մեկնաբանում է հետազոտական խմբի ղեկավար Սավերիո Սթրեյնջչերսը:- Դա կարող է նաև կապված լինել կյանքից սպասելիքների նվազման հետ։ Նվազում է նաև աշխատանքից կամ անձնական կյանքից սթրեսների առաջացման հավանականությունը»:
Բացի այց, գիտնականները նշում են, որ տարիքին զուգընթաց նվազում է մարդու ինքնաքննությունը, որն էլ հենց հանդիսանում է վատ տրամադրության և հիասթափությունների հիմնական աղբյուրներից մեկը:
Նման եզրակացության են եկել նաև Սթենֆորդի համալսարանի գիտնականները: Նրան հավելում են, որ հասուն տարիքում մարդիկ ավելի քիչ բացասական զգացողություններ են ունենում և ավելի հեշտ են կարողանում դրանք հաղթահարել, քան 20-30 տարեկան երիտասարդները:
