Օրինական պետության համար պայքարողների ԱԺ-ում հայտնվելու ցանկությունը ողջունում եմ: Այսօր «Առաջին լրատվական»-ի հետ զրույցում նման տեսակետ հայտնեց
ԱԺ «Ժառանգություն» խմբակցության պատգամավոր Անահիտ Բախշյանը` անդրադառնալով Շուշան Պետրոսյանի այն մտքին, թե չէր հրաժարվի պատգամավոր դառնալ: «Առաջին լրատվական»-ի հարցին՝ ինչպե՞ս է վերաբերվում շոու-բիզնեսի ներկայացուցիչների` մասնավորապես երգչուհի Շուշան Պետրոսյանի այն մտքին, թե չէր հրաժարվի պատգամավոր դառնալ, պատասխանեց, որ չէր ցանկանա սևեռվել Շուշան Պետրոսյանի վրա, որովհետև, ըստ պատգամավորի, դա իր որոշելիքն է:
«ՀՀ յուրաքանչյուր քաղաքացի, ով իր մեջ տեսնում է մեր երկրում ինչ-որ բան փոխելու, օրինական, իրավական երկիր ստեղծելու հնարավորություն, հմտություն, կամք, ջանք և դրա համար պատրաստ է գալ ԱԺ, ես ողջունում եմ»,- նշեց Անահիտ Բախշյանը`
հավելելով, որ ողջունում է, եթե մարդն իր մեջ տեսնում է այդ կարողությունը՝ գնալ ԱԺ և պայքարել օրինական և իրավական պետության համար, բայց ոչ պարզապես պատգամավորի մանդատ ստանալու համար:
Հիշեցնենք, որ այսօր լրագրողների հետ հանդիպման ժամանակ հայրենական շոու-բիզնեսի ներկայացուցիչ, սիրված երգչուհի Շուշան Պետրոսյանը նշել է, որ չէր հրաժարվի գալիք Աժ ընտրություններին մասնակցել ՀՀԿ ցուցակով, եթե լիներ հրավեր կուսակցության կողմից:
