«Ես ի սկզբանե դեմ եմ եղել «Եվրատեսիլ» գնալուն: Ինչքան էլ այն լավ երևույթ է, բայց, այնուամենայնիվ, չպետք է ազգային արժանապատվությունից վեր դասել: Մանավանդ որ, ոչ վաղ անցյալում են Սումգայիթյան ջարդերը»,- այս մասին լրագրողների հետ հանդիպմանն ասաց երգչուհի Ալլա Լևոնյանը: Ըստ նրա` սա այն տարբերակը չէ, որ գնանք ինչ-որ բան ապացուցելու: Մենք հաղթանակած ենք և դրա կարիքն ամենևին էլ չունենք: Ուղղակի պետք է արհամարհել նրանց:
Երգիչ Արսեն Գրիգորյանը (Մրո), խոսելով «Եվրատեսիլ» գնալու մասին, նշեց, որ մենք մասնագիտականից զատ, պետք է ուշադրություն դարձնենք ազգային արժանապատվությանը. «Հենց սկզբից պետք է պարզ լիներ, որ չենք գնալու: «Եվրատեսիլին» մասնակցել կամ չմասնակցելը կենաց և մահու հարց չէ, ու կարիք չկա այսքան այն ֆետիշացնել»: Նա ևս փաստեց, որ այստեղ կա ազգային արժանապատվության խնդիր. «Պետք է այս ամենը ճիշտ ընկալել: Մենք չենք բոյկոտում «Եվրատեսիլը», պարզապես չենք գնում Բաքու»:
Վերջում բանախոսները հայտնեցին, որ այնկախ այն բանից, թե մարտի 18-ին ինչ որոշում կկայացնի Հանրային հեռուստաընկերությունը, իրենք իրենց կարծիքը չեն փոխելու:
«Ով որ կասի թող գնա, ուրեմն ինքը պատասխանատու կլինի հետևանքների համար»,- հավելեց Արսեն Գրիգորյանը:
