Ադրբեջանական APA լրատվական գործակալության փոխանցմամբ՝ Եվրոպայի ու Եվրասիայի հարցերով ԱՄՆ պետքարտուղարի օգնական Ֆիլիպ Գորդոնը Վաշինգտոնում ելույթ է ունեցել՝ կապված ԱՄՆ-ի ու Ադրբեջանի միջև հարաբերությունների հաստատման 20-ամյակի հետ.
«Երկու երկրների հարաբերությունների միջուկը կազմում են անվտանգությունը, էներգետիկան, քաղաքական ու տնտեսական բարեփոխումները: Ադրբեջանցի զինվորականներն իրենց ամերիկացի գործընկերների հետ միջազգային անվտանգություն են ապահովում Կոսովոյում, Իրաքում:
Ադրբեջանը կենսական դեր է խաղում դեպի Աֆղանստան բեռների փոխադրման հարցում: Ամերիկյան հազարավոր ինքնաթիռներ Ադրբեջանի տարածքն օգտագործում են որպես տարանցիկ երկիր: Ոչ վաղ անցյալում Ադրբեջանը դարձավ ՄԱԿ ԱԽ ժամանակավոր անդամ, որով և նա ստանձնեց գլոբալ անվտագության ոլորտին առնչվող պարտավորություններ: Ադրբեջանը նաև կարևոր դեր է խաղացել Իրանի դեմ պատժամիջոցների սահմանման հարցում:
ԱՄՆ-ը՝ որպես ԵԱՀԿ Մինսկի խմբի համանախագահ, շարունակելու է սերտորեն համագործակցել հակամարտող կողմերի հետ՝ տևական խաղաղության հասնելու համար: Սովորաբար վերջին քայլերն ամենաբարդն են, սակայն մենք հավատում ենք, որ խաղաղությունը հնարավոր է: Այն անհրաժեշտ է:
Հակամարտող կողմերի ցուցաբերած քաղաքական կամքի դեպքում մենք կարող ենք առաջ ընթանալ խաղաղության հասնելու ճանապարհին: Միայն բանակցությունների միջոցով խնդրի կարգավորումը կարող է հանգեցնել կայունության և ճանապարհ հարթել տարածաշրջանային զարգացման ու համագործակցության համար:
ԱՄՆ-ը սերտորեն համագործակցում է Ադրբեջանի հետ նաև էներգոանվտանգության ոլորտում, ինչի մասին են վկայում «Դարի պայմանագիրը» և «Բաքու-Թբիլիսի-Ջեյհան» նավթամուղը: Մենք ողջունում ենք նախորդ տարվա հոկտեմբերին Թուրքիայի ու Ադրբեջանի միջև կնքված ադրբեջանական գազի՝ թուրքական տարածքով դեպի Եվրոպա տարանցման մասին համաձայնագիրը»:
