Ռուսական Интерфакс գործակալության փոխանցմամբ՝ Աբխազիան փակել է իր սահմանները՝ կապված այսօր առավոտյան նախագահ Ալեքսանդր Անկվաբի դեմ իրականացված մահափորձի հետ: Այս մասին հայտնում են Աբխազիայի ուժային կառույցներում եղած իրազեկ աղբյուրները:
Վերջիններս ընդգծում են, որ ռուս-աբխազական սահմանը հատելու ռեժիմը բավական խստացվել է, իսկ Վրաստանի հետ սահմանն ամբողջութամբ փակվել է: Նրանք հավելել են, որ հանցագործների հայտնաբերման հիմնական աշխատանքները տարվում են Գուդաուտայի շրջանի լեռներում և անտառներում:
Աբխազիայի Գլխավոր դատախազությունն Անկվաբի դեմ կատարված մահափորձի կապակցությամբ հարուցել է քրեական գործ՝ 275-րդ (պետական գործչի նկատմամբ մահափորձ), 99-րդ (իրենց ծառայողական պարտականությունները կատարելիս երկու կամ ավելի անձանց սպանություն) և 217-րդ (ապօրինի ձևով զենք, զինամթերք ու պայթուցիկ պահել, կրել ու տեղափոխել) հոդվածներով:
