Ըստ ԱՎԾ հրապարակած տվյալների` 2010թ. նոյեմբերին Երևան քաղաքի մթնոլորտային օդի փորձանմուշներում ավտոմատ կայանների միջոցով որոշվել են ածխածնի մոնօքսիդի, ծծմբի երկօքսիդի, ազոտի օքսիդների պարունակությունները:
Ըստ ավտոմատ սարքերի տվյալների` ավտոմատ կայանների հարակից տարածքի
մթնոլորտային օդի փորձանմուշներում ածխածնի մոնօքսիդի միջին ամսական
կոնցենտրացիան ՍԹԿ-ից (սահմանային թույլատրելի կոնցենտրացիայից) ցածր է եղել 1.7 անգամ, իսկ ազոտի երկօքսիդի միջին ամսական կոնցենտրացիան ՍԹԿ-ն գերազանցել է 1.3 անգամ, ազոտի օքսիդինը` 2.2 անգամ:
Գյումրի քաղաքի մթնոլորտային օդում փոշու միջին ամսական կոնցենտրացիան ՍԹԿ-ն գերազանցել է 2.1 անգամ: Հոկտեմբեր ամսվա համեմատ փոշու միջին ամսական կոնցենտրացիան բարձրացել է 1.2 անգամ: Քաղաքի պասիվ նմուշառման դիտակետերի միջոցով վերցված մթնոլորտային օդի փորձանմուշներում ծծմբի երկօքսիդի միջին ամսական կոնցենտրացիան ՍԹԿ-ից բարձր է եղել 1.7 անգամ, իսկ ազոտի երկօքսիդի միջին ամսական կոնցենտրացիան դիտվել է թույլատրելի նորմայի սահմանում:
Վանաձոր քաղաքի պասիվ նմուշառման դիտակետերի միջոցով վերցված մթնոլորտային օդի փորձանմուշներում ծծմբի երկօքսիդի միջին ամսական կոնցենտրացիան ՍԹԿ-ից բարձր է եղել 2.0 անգամ, իսկ ազոտի երկօքսիդի միջին ամսական կոնցենտրացիան դիտվել է թույլատրելի նորմայի սահմանում:
Նշենք նաև, որ 2010թ. նոյեմբերին ՀՀ մթնոլորտի աղտոտվածության որակի մոնիտորինգ իրականացվել է Գյումրի, Հրազդան և Արարատ քաղաքներում տեղակայված 3 մշտական լաբորատոր դիտակայանների, Երևան, Ալավերդի,
Վանաձոր, Գյումրի, Հրազդան, Ծաղկաձոր, Վաղարշապատ, Աբովյան և Սևան քաղաքներում տեղակայված պասիվ նմուշառման 142 դիտակետերի, Երևան, Ալավերդի, Ծաղկաձոր քաղաքներում և Ամբերդ գյուղում տեղակայված ավտոմատ կայանների միջոցով: Այս բոլոր քաղաքներում որոշ տարրերի գծով ՍԹԿ-ից բարձր կոնցենտրացիաներ են նկատվել:
