ՀՀՇ նախագահ Արամ Մանուկյանը Հրազդանում փետրվարի 12-ին տեղի ունեցած ընտրությունների ժամանակ կաշառքի բազմաթիվ դեպքերի է ականատես եղել: Այս մասին նա ասաց այսօր լրագրողների հետ հանդիպման ժամանակ:
«Այո, կաշառքի դեպքեր եղել են: Մենք նույնիսկ նկարահանումներ ունենք, որոնք կհրապարակենք «Յութուբ»-ում: Իհարկե, ոստիկանները ըստ կարգի ստուգեցին այդ մարդուն, բայց փողն այլևս նրա մոտ չէր. նա կուլ էր տվել գումարը: Ինձ նույնիսկ ասացին, որ կարող են զրպարտիչ լինելու համար պատժել: Բայց ես խղճացի կաշառք վերցրած այդ մարդուն՝ նրա մեջ տեսնելով ոչ թե կաշառակերի, այլ զոհի, որն ամեն նոր ընտրողի բերելու համար 5000 դրամ էր ստանում: Սա քաղաքացուն սպանելու գործընթաց էր:
Հրազդանյան ընտրություններով Սերժ Սարգսյանը ձախողվեց և ապացուցեց, որ ինքը սուտասան է, քանի որ իր խոստացած ազնիվ ընտրությունները տեղի չունեցան: Իշխանությունն ապացուցեց, որ ինքն ընտրագող է և չի կարող նորմալ ընտրություններ անցկացնել: Հինգ հազար դրամը որոշեց Հրազդանի քաղաքապետին: Դրա համար էլ սրանց հավատալ չի կարելի: Չեմ կասկածում, որ նույն արդյունքները կկրկնվեն նաև ԱԺ ընտրությունների ժամանակ: Բայց մենք միջազգային կառույցներին կհասկացնենք, որ իշխանությունները «ֆռռացնում են» իրենց»,- ասաց նա:
Ամփոփելով` Մանուկյանը նշեց, որ ԱՄՆ դեսպանը աջակցում է Սերժ Սարգսյանին` փոխարենը ստանալով ռեգիոնալ զիջումներ` ի վնաս Հայաստանի:
