Ռիո դե Ժանեյրոյի կենտրոնում փլուզվել է առնվազն 2 բարձրահարկ շենք: Այս մասին հաղորդում է Reuters գործակալությունը՝ վկայակոչելով բրազիլական ԶԼՄ-ները:
Գործակալությունը նշում է, որ նախ փլվել է 20-հարկանի մի շենք, (որոշ տվյալներով` 18-հարկանի), որից հետո փլվել է նրա կողքին գտնվող 10-հարկանի շենքը: Որոշ ԶԼՄ-ներ հայտնում են, որ այդ բարձրահարկերի միջև եղել է 4-հարկանի մի շինություն, որը նույնպես փլվել է:
Դեպքի վայր ժամանած Ռիո դե Ժանեյրոյի քաղաքապետ Էդուրադո Պաէշը լրագրողներին հայտնել է, որ շենքերի փլատակների տակից հանվել է 4 մարդ: Ավելի վաղ արտահերթ ծառայությունների աշխատակիցները հայտնում էին, որ փլված շենքերում արգելափակված է մնացել 11 մարդ, որոնց թվում, ըստ նրանց, կարող են լինել զոհեր և վիրավորներ: Ըստ CNN-ի՝ առնվազն 2 մարդ զոհվել է:
Քաղաքի կենտրոնում՝ Սինելանդիա հրապարակից ոչ հեռու տեղակայված շենքերի փլուզումը տեղի է ունեցել չորեքշաբթի՝ հունվարի 25-ին՝ տեղի ժամանակով 20:30-ի սահմաններում: Շենքերում եղել են գրասենյակներ, այդ թվում բանկերի մասնաճյուղեր, և Petrograd նավթային ընկերությոան ներկայացուցչությունը:
Ոչ պաշտոնական տվյալներով՝ փլուզումների պատճառը եղել է վերանորոգչական-շինարարական աշխատանքների ժամանակ անվտանգության կանոնների խախտումը: Դեպքի ականատեսները, սակայն, պատմում են, որ փլուզումից առաջ պայթյունի ձայն են լսել: Քաղաքի իշխանություններն ու իրավապահ մարմիններն առայժմ չեն մեկնաբանում կատարվածը: