Իրեն արձակագիր համարող, Երևանի նախկին քաղաքապետ Սուրեն Աբրահամյանը, ամփոփելով տարվա ընթացքում տեղի ունեցած իրադարձությունները, հիշեցրեց դեռ երկար տարիներ առաջ իր արտասանած խոսքերը. «Այն ամենի մասին, ինչ այսօր կա, այն ժամանակ մենք ասում էինք զոռբայություն, այլանդակություն, ուղեծրից շեղված երկիր: Ասում էինք, որ այս արժեքային համակարգով մեր երկիրն ապագա չի կարող ունենալ, ու մեզ ասում էին՝ չարացած մարդիկ: Այսօր այդ նույն բանն իրենք են ասում»,- նշեց Սուրեն Աբրահամյանը: Ինչ վերաբերում է հայաստանյան վերջին պաշտոնանկություններին` Աբրահամյանը խիստ կասկածեց, որ դրանցից առաջինը քաղաքապետի պաշտոնանկությունը կլիներ, եթե ծեծվողը մի հասարակ քաղաքացի լիներ. «Բայց ո՞ւմ են ծեծել. ձեզ ծեծեին, ինձ ծեծեին՝ անպատիժ էին մնալու: Սին հույսեր են… Սերժ Սրագսյանն այդ հանցավոր համակարգի պրոդուկտն է»,- նշեց Աբրահամյանը: Նրա համոզմամբ, մինչև արմատական իշխանափոխություն չլինի, երկրում ոչինչ չի փոխվի: Առավել ևս, երբ խոսքը մի երկրի մասին է, որտեղ դեռ քաղբանտարկյալներ կան:
Գալիք Նոր տարվա առթիվ Աբրահամյանը շնորհավորեց ողջ հայությանն ու հատկապես իր քաղբանտարկյալ ընկերներին` մաղթելով համբերություն ու տոկունություն:
Սուրեն Աբրահամյանն իր խոսքն ամփոփեց անեկդոտով. «Աստված կանչում է Սարգսյանին, Օբամային և Մեդվեդևին իր մոտ ու ասում, թե աշխարհի վերջն է, գնացեք, ձեր ժողովուրդներին զգուշացրեք, որ առանց խուճապի միմյանց հրաժեշտ տան, բայց թող հուսով լինեն, որ ես կամ, և կյանքը նորից սկիզբ կառնի:
Մեդվեդևը գալիս է Կարմիր հրապարակ, հավաքում ամբողջ Ռուսաստանը և հայտարարում.
– 2 վատ լուր ունեմ ասելու: Լսեք, նախ բանից պարզվում է՝ Աստված կա, երկրորդն էլ՝ գնացեք միմյանց հրաժեշտ տվեք, աշխարհի վերջն է:
Օբաման գալիս է Սպիտակ տուն, ամբողջ Ամերիկան հավաքում և հայտարարում.
– Ես ձեզ մի վատ ու մի լավ լուր ունեմ ասելու: Լավն այն է, որ Աստված կա, մեր մասին մտածում է, վատն էլ այն է, որ աշխարհի վերջն է, գնացեք հրաժեշտ տվեք միմյանց, բայց մի օր էլի լույսը կբացվի:
Սերժ Սարգսյանն է գալիս, ամբողջ հայությանը հավաքում Հանրապետության hրապարակում և ասում.
– Ժողովուրդ ջան, 2 լավ լուր ունեմ ասելու: Առաջինն այն է, որ Աստծու մոտ էի, էդ ինչ պատիվ տվեց, խորովածով, քյաբաբով, մի լավ կերանք, խմեցինք, երկրորդն էլ՝ ասաց՝ Սերժ ջան, գնա, մինչև կյանքիդ վերջն էլ նախագահ ես:
