Reuters գործակալությունը, վկայակոչելով իր անանուն աղբյուրին, հայտնում է, որ Հունաստանի իշխանությունները պատրաստ են աջակցել ԵՄ-ի գծով իրենց գործընկերներին, եթե վերջիններս բեռնարգելք դնեն իրանական նավթի վրա։
Սա տեղի է ունենում իրանական նավթի ներկրումից պաշտոնական Աթենքի ունեցած կախվածության աճի ֆոնին։ 2011 թվականի երկրորդ եռամսյակում Հունաստանն Իրանից օրական գնել է ավելի քան 100,000 բարել նավթ։ Դրանով իսկ Հունաստանի ներկրած նավթի 35 տոկոսը բաժին է ընկել Իրանին։
Տևական ճգնաժամի ու դեֆոլտի սպառնալիքի պայմաններում նավթի բազմաթիվ մատակարարներ հրաժարվել են համագործակցել Աթենքի հետ։ Սակայն Իրանը, չնայած Հունաստանի ֆինանսական խնդիրներին, չի դադարեցրել նավթի մատակարարումը։
Սակայն ներկայումս Հունաստանը գտնվում է ԵՄ-ից ու Արժույթի միջազգային հիմնադրամից ֆինանսական կախվածության մեջ, և այդ պատճառով էլ չի կարող անտեսել նրանց դիրքորոշումն Իրանի նկատմամբ։
Նշվում է, որ իրանական նավթի բեռնարգելքի հարցը կարող է վճռվել հունվարի 30-ին կայանալիք՝ ԵՄ անդամ երկրների ֆինանսների նախարարների հանդիպման ժամանակ։
