ՀՀ փոխվարչապետ, հայ-քուվեյթյան միջկառավարական հանձնաժողովի համանախագահ Արմեն Գևորգյանն այսօր ընդունել է ՀՀ-ում Քուվեյթի նորանշանակ դեսպան Բասամ Մուհամմադ ալ-Քաբանդինին:
Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին հայտնում են, որ փոխվարչապետը նշել է, որ Հայաստանը հետաքրքրված է Քուվեյթի հետ առևտրատնտեսական համագործակցության խորացմամբ:
Ա. Գևորգյանի խոսքով` Ծոցի երկրներից Քուվեյթն առաջինն է, որի հետ հարաբերություններն ավելի համակարգված բնույթ են ստանում. հոկտեմբերին Երևանում անցկացվել է հայ-քուվեյթական միջկառավարական հանձնաժողովի առաջին նիստը, երկու երկրներում արդեն գործում են դեսպանատները, ինչը նոր խթան է երկկողմ առևտրատնտեսական հարաբերությունների զարգացման համար:
Նշվել է, որ հանձնաժողովի առաջին նիստից հետո արդեն որոշակի քայլեր իրականացվել են. վերջերս Քուվեյթ է այցելել Զարգացման հայկական գործակալության պատվիրակությունը, որը բավական արդյունավետ հանդիպումներ է ունեցել արաբ գործընկերների հետ:
Հայաստան են այցելել նաև քուվեյթցի գործարարները` փոխգործակցության հնարավորություններին տեղում ծանոթանալու նպատակով:
Երկկողմ հարաբերությունների զարգացման առումով կարևորվել է երկուստեք գործնական քայլերի իրականացումը օդային հաղորդակցության հաստատման ուղղությամբ, որի վերաբերյալ համաձայնագիր կողմներն ստորագրել էին միջկառավարական հանձնաժողովի առաջին նիստի ընթացքում:
Հեռանկարային է Հայաստանում արտադրվող սննդամթերքի արտահանումը Քուվեյթ, ինչպես նաեւ համագործակցությունը ներդրումային ոլորտում. մասնավորապես` քուվեյթյան ընկերությունները կարող են մասնակցել Հայաստանում, հատկապես ենթակառուցվածքների ոլորտում իրականացվող ծրագրերին:
Փոխվարչապետը հույս է հայտնել, որ միջկառավարական հանձնաժողովի երկրորդ նիստի ժամանակ արդեն կլինեն կոնկրետ արդյունքներ, որոնք արձանագրելով` կողմերն առաջ կշարժվեն հետագա փոխգործակցության ընդլայնման ուղղությամբ:
Նա կառավարության անունից պատրաստակամություն է հայտնել աջակցել երկկողմ շփումների ակտիվացմանն ուղղված բոլոր նախաձեռնություններին:
Դեսպանն իր հերթին նշել է, որ Քուվեյթում նույնպես մեծ նշանակություն են տալիս Հայաստանի հետ կապերի խորացմանը, հատկապես առևտրատնտեսական հարաբերությունների զարգացմանը:
Այս նպատակով քուվեյթական կողմը նախատեսում է համագործակցել ինչպես պետական, այնպես էլ մասնավոր հատվածի հետ:
Դիվանագետը վստահեցրել է, որ իր կողմից կանի հնարավորը` երկկողմ հարաբերությունների ընդլայնմանը նպաստելու համար:
