ՀՀ փոխվարչապետ, տարածքային կառավարման նախարար Արմեն Գևորգյանն այսօր Գեղարքունիքի մարզ կատարած այցի շրջանակում ներկա է գտնվել Սևան քաղաքի պոլիկլինիկայի բացման արարողությանը, որին մասնակցել են նաև առողջապահության նախարար Հարություն Քուշկյանը, մարզպետ Նվեր Պողոսյանը:
Բժշկական հաստատությունն ամբողջությամբ հիմնանորոգվել է Հայաստանի սոցիալական ներդրումների հիմնադրամի ծրագրով: Ներդրումների ծավալը կազմել է 185 մլն դրամ, համայնքը ևս համաֆինանսավորման միջոցով մասնակցություն է ունեցել: Հաստատությունն ապահոված է ջեռուցման համակարգով, ստեղծված են անհրաժեշտ բոլոր պայմանները: Վերազինումն իրականացվել է Առողջապահության նախարարության կողմից. հատկացվել են 44 մլն դրամի բժշկական սարքավորումներ և գույք:
Հյուրերը շրջել են շենքում, ծանոթացել ստեղծված պայմաններին: Փոխվարչապետը դրական է գնահատել կատարված աշխատանքները` նշելով, որ կառավարության կողմից մեծ ուշադրություն է դարձվում մարզերում բնակիչներին որակյալ ծառայություններով ապահովելու հարցին, ինչը նաև տարածքների համաչափ զարգացման քաղաքականության խնդիրներից է: Այդ ուղղությամբ աշխատանքները շարունակվում են. մասնավորապես` ՀԲ- ի աջկացությամբ իրականացվող «Առողջապահական համակարգի արդիականացում» ծրագրի շրջանակում ևս
մարզերում իրականացվում են բուժհաստատությունների վերականգնման ու վիրազինման աշխատանքներ:
Փոխվարչապետն այցելել է նաև մարզի Ծովագյուղ համայնք, ծանոթացել մանկապարտեզի հիմնանորոգման աշխատանքներին: Այդ նպատակով գումարներ են հատկացվել մարզի առաջնահերթ խնդիրների լուծման ծրագրով, որի առաջին մասով տրամադրվել է 38, 6, երկրորդ մասով` 35,7 մլն դրամ: Ամբողջությամբ հիմնանորոգվել են երեք մասնաշենքերը: Փոխվարչապետին զեկուցվել է, որ աշխատանքերը կավարտվեն մայիսին: Ա. Գևորգյանը պատասխանատուներին հորդորել է աշխատանքերը կատարել որակով և նախատեսված ժամկետներում:
Այս մասին «Առաջին լրատվական»ին տեղեկացնում է Տարածքային կառավարման նախարարության հասարակայնության հետ կապերի բաժնից:
