Ռուսական Regnum լրատվական գործակալության փոխանցմամբ՝ Թուրքիան լայն կամպանիա է ձեռնարկել Ֆրանսիայի կողմից «ալժիրցիների ցեղասպանության» ճանաչման ուղղությամբ։ Այս մասին հայտնում են թուրքական աղբյուրները։
Նրանք ընդգծում են, որ տվյալ հարցն արդեն իսկ ընդգրկված է Ալժիրի և այլ արաբական երկրների հետ պաշտոնական Անկարայի խորհրդակցությունների օրակարգում։
Ըստ թուրքական աղբյուրների՝ ավելի քան 40 երկրներ, այդ թվում՝ նաև Թուրքիան կարող են օրենսդրական մակարդակով 1945 թվականի մայիսին պաշտոնական Փարիզի իրականացրած գործողությունները ճանաչել որպես «ցեղասպանություն»։ Թուրքական կողմն ընդգծում է, որ ալժիրյան ապստամբության ճնշման ժամանակ սպանվել է 45,000 մարդ։
Թուրքական կողմը ֆրանսիական կողմին զգուշացրել է, որ եթե Ֆրանսիայի խորհրդարանը դեկտեմբերի 22-ին ընդունի Հայոց ցեղասպանության հերքումը քրեականացնող օրինագիծը, ապա նմանատիպ (ալժիրյան) օրենսդրական ակտերը «կարող են հայտնվել» աշխարհի ավելի քան 40 երկրների խորհրդարանական լսումներում։
