Ամանորին հաշված օրեր են մնացել ու շատերին հետաքրքրում է հարցը`ինչպե՞ս դիմավորել Նոր տարին, ինչ գույնի ու ձևվածքի հագուստներով, քանի որ ըստ արևելյան հորոսկոպի` այս տարին Սև վիշապի տարի է:
Լրագրողների հետ հանդիպմանն այս հարցերին փորձեց պատասխանել Նորաձևության հայկական խորհրդի անդամ, դիզայներ Լիլիթ Մարգարյանը:
«Կենդանակերպի բոլոր նշաններից վիշապը տարբերվում է նրանով, որ այն հորինված կենդանի է, ու չնայած դրան, ըստ լեգենդների, գիտենք, որ վիշապները փառասեր են ու հարստության հովանավորներ»,- ասաց դիզայները` խորհուրդ տալով Ամանորի գիշերը սեղանին դնել շողշողացող բյուրեղապակյա բաժակներ, ոսկեզօծ սպասք, քանի որ «վիշապը սիրում է, որ իրեն դասավորեն արքայավայել»:
Ինչ վերաբերում է հագուստներին, ապա դիզայները խորհուրդ տվեց վիշապին դիմավորել շքեղ ու փայլուն, վառ գույնի զգեստներով, թանկարժեք զարդեր, ոսկեղեն կրել:
«Վիշապը բարձր կգնահատի ձեր ջանքերը: Քանի որ Արևելքում վիշապները եղել են կառնավալների ամենակատիվ մասնակիցներ, նշանակում է, որ նրանք նախընտրում են վառ, փայլփլուն հագուստներ»,- հավելեց նա` ընդգծելով, որ վիշապի ամենասիրած գույները կանաչն ու կարմիրն են:
Ինչ վերաբերում է տոնածառը զարդարելուն, ապա ըստ դիզայների՝ դրա ձևավորման մեջ վիշապը մեծ տեղ չունի:
Ավանդաբար, տոնածառը պետք է լինի շքեղ ու փայլուն, կանաչ-կարմիր խաղալիքներով:
«Քանի որ սև վիշապի տարի է, կարելի է տոնածառի զարդարանքի մեջ օգտագործել նաև սև գույնը»,- խորհուրդ տվեց դիզայները:
Նա տեղեկացրեց, որ մոդելավորողների ու Արևելյան հորոսկոպների մասնագետների ջանքերով կազմվել է մի հորոսկոպ, ըստ որի` կենդանակերպի յուրաքանչյուր նշան ունի այն գույնը, որը կարելի է կրել Ամանորի գիշերը:
Նրա խոսքով, վիշապների համար լավագույն ընտրությունը կլինի դեղինն ու ոսկեգույնը, օձերին հաջողություն կբերի թագավորական կարմիրը, թավշե, ատլասե զգեստները, ձի կենդանակերպի նշաններին հաջողություն կբերի կարմիրը, խոյերին, ցուլերին, շներին` դեղին գույնը, որը կարելի է կրել ոսկե զարդերով:
Կապիկները ու աքլորները կարող են կրել սպիտակ գույնի հագուստներ, իսկ վարազները` սև զգեստ, ծավալուն չափերով, զարդարված փետուրներով, առնետներին դարձյալ հաջողություն կբերի սև գույնը:
Վագրերին ու նապաստակներին խորհուրդ է տրվում կրել կանաչ գույնի զգեստ:
Լ. Մարգարյանը նշեց, որ այս խորհուրդներին հետևելը ցանկալի է, բայց ոչ պարտադիր, քանի որ Ամանորի գիշերը պետք է դիմավորել բարեձև տրամադրությամբ, հարազատների ու ընկերների շրջապատում:
