Սիրիայի ԱԳՆ-ն հայտարարել է, որ ամերիկյան ABC հեռուստաալիքը, որին օրերս հարցազրույց էր տվել Սիրիայի նախագահ Բաշար Ալ-Ասադը, դիտավորյալ աղավաղել է Սիրիայի նախագահի խոսքերը:
Ինչպես հաղորդում է France-Press գործակալությունը, Սիրիայի ԱԳՆ մամլո քարտուղար Ջիհադ Մակդեսին նշել է, որ ամերիկյան հեռուստաալիքը բաց է թողել հարցազրույցի մի մասը, որպեսզի Սիրիան հնարավորինս սև գույներով ներկայացնի: «Ես չգիտեմ՝ ով է թույլ տվել այդ սխալը, սակայն դա դիտավորյալ է արվել, քանի որ նրանք ցանկացել են Սիրիան ներկայացնել ոչ այնպես, ինչպես կա իրականում»,- ասել է նա:
ABC հեռուստաալիքին տված հարցազրույցում Բաշար Ալ-Ասադը հայտարարել էր, որ երկրում արդեն ավելի քան 9 ամիս շարունակվող բախումների ժամանակ զոհվել են հիմնականում իր կողմնակիցները, զինվորականներ և ոստիկաններ: Սիրիայի նախագահը նաև նշել էր, որ ինքը ցուցարարների վրա կրակելու հրաման չի տվել: «Աշխարհում ոչ մի կառավարություն չի սպանում իր մարդկանց, եթե իհարկե այն խելագար մարդ չի գլխավորում»,- ասել էր նա:
