Վերջին 15 տարիներին տեղական ինքնակառավարման մարմիններում մեծածավալ աշխատանքներ են կատարվել: Այս մասին այսօր կայացած մամուլի ասուլիսում հայտարարեց Լոռու մարզպետ Արթուր Նալբանդյանը:
«ՏԻՄ-երը Հայաստանում ամենակայացած ինստիտուտներից են: Ինչ վերաբերում է կոնկրետ մեր մարզին, ապա համայնքի աշխատանքները փորձում ենք ավելի թափանցիկ դարձնել, ինչն էլ հիմք է տալիս համայնքի` էլ ավելի արագ զարգացմանը:
Վերջին երեք տարիներին հատկապես կառավարության կողմից հստակ հանձնարարականներ են տրվել, տարածքային կառավարման նախարարությունը հետամուտ է համայնքների ֆինանսական հարցերում: Մեր մարզն ունի ընդամենը 2,5 մլն դրամ պարտք, որը մինչև տարեվերջ անպայման կմարվի, մինչդեռ տարիներ առաջ այդ թիվը հասնում էր տասնյակ միլիոնների:
Ուշադրություն ենք դարձնում համայնքների` ռեալ, իրատեսական բյուջե ունենալու խնդրին: Համայնքները վերջին տարիներին էլ ավելի ինքնուրույն են դառնում: Դրանք համայնքային ավագանու հետ համատեղ կառավարման ոլորտում լուրջ աշխատանքներ են տանում:
Մենք փորձում ենք, որքան հնարավոր է, համայնքներում մեծացնել միջազգային կառույցների դերը, երբեք չենք թաքցնում համայնքների խնդիրները: Փորձում ենք քննարկումների և հաշվետվությունների միջոցով գտնել խնդիրների լուծման ճանապարհները: Բնակչությունը մի փոքր պասիվ է. կամ մտածում են, որ իրենց մասնակցությունը ոչ մի բան չի փոխի կամ էլ շատ են վստահում համայնքային մարմիններին»,- կարծիք հայտնեց Արթուր Նալբանդյանը:
Անդրադառնալով այս տարվա ընթացքում մարզային 113 համայնքներում կատարված աշխատանքներին`Լոռու մարզպետը նկատեց` եթե այդ համայնքներում խնդիրներ են հայտնաբերվում, ապա տվյալ համայնքին շրջաբերականներ են ուղարկվում, որպեսզի խնդիրները վերացվեն և չկրկնվեն: Մարզպետարանի կողմից վերահսկողությունը անընդհատ կատարվում է, հանձնաժողովներ են ձևավորվում, որոնք էլ մարզերում իրականացնում են ֆինանսական և այլ բնույթի ստուգումներ:
Մարզերի համաչափ զարգացման շրջանակներում այս տարի պետբյուջեից Լոռու մարզին հատկացվել է 2 մլրդ 600 հազար դրամ: Այդ գումարները նպատակային ծախսելու համար հսկող մամիններ են ստեղծվում: Գումարները ծախսվում են դպրոցաշինության, ճանապարհաշինության, բնակֆոնդի և այլ խնդիրների լուծման նպատակներով:
Բնակչության հետ քննարկումներում խնդիրներ են հստակեցվում, և տրամադրված գումարների հաշվին դրանք լուծում են ստանում »,- նկատեց մարզպետը:
Նալբանդյանը նաև նշեց, որ ֆինանսական խախտումներ մարզում ևս հայտնաբերվել են, սակայն փոքր չափերի: «Դրանք ընդամենը հաշվարկային սխալներ են, մեծ ծավալի խախտումներ չեն հայտնաբերվել»,- տեղեկացրեց նա:
