Իսրայելական Mig News-ը՝ վկայակոչելով բրիտանական The Sunday Times պարբերականին, հայտնում է, որ օրեր առաջ Իրանի Սպահան քաղաքի մոտ տեղի ունեցած խորհրդավոր պայթյունը վնաս է հասցրել քաղաքի առանցքային միջուկային օբյեկտին։
Հիշեցնենք, որ երկուշաբթի երեկոյան իրանական Fars News լրատվական գործակալությունը հայտնել էր, որ տեղական ժամանակով ժամը 14.00-ին Սպահանում տեղի է ունեցել ուժեղ պայթյուն, սակայն որոշ ժամանակ անց այդ տեղեկատվությունն անհետացել էր, ապա իրանական կողմն ընդհանրապես հերքել էր պայթյունի մասին լուրը։
Այս կապակցությամբ բրիտանական պարբերականը հավելում է, որ պայթյունը տեղի չի ունեցել զորավարժությունների ժամանակ, և որ այն մեծ վնաս է հասցրել Սպահանի միջուկային օբյեկտին։ Բրիտանական պարբերականն այս հարցում հենվում է իսրայելական հետախուզությունում ունեցած իր աղբյուրի վրա։
Աղբյուրն իր հերթին նման եզրահանգման է եկել արբանյակային նկարահանումների պատճառով, որոնց վրա երևում է, թե ինչպես է Սպահանի ուրանի հարստացման գործարանից ծուխ բարձրանում։ Աղբյուրի պնդմամբ՝ պայթյունն անկասկածորեն վնասել է միջուկային սարքավորումը, և դա «դժբախտ պատահար» չէ։
Հիշեցնենք, որ Սպահանում գտնվող ուրանի հարստացման գործարանը շահագործման է հանձնվել 2004 թվականին։