ՌԴ նախագահ Դմիտրի Մեդվեդեւը մոլորություն է որակել Ռուսաստանը Խորհրդային Միության հետ նույնացնելու` Արեւմուտքի փորձերը: Ինչպես հաղորդում է «Ռիա Նովոստի» գործակալությունը, այս մասին ՌԴ նախագահը հայտարարել է Մյունխենյան անվտանգության կոնֆերանսի մասնակիցների հետ հանդիպման ժամանակ` ընդգծելով, թե Եվրոպայի հետ հարաբերությունները ՌԴ արտաքին քաղաքականության կարեւորագույն ուղղություններից են: «Այդպես եղել է Խորհրդային Միության տարիներին, այդպես էլ հիմա է՝ չնայած Ռուսաստանին հաճախ են փորձում նույնացնել Խորհրդային Միության հետ, ինչը մեծ եւ լուրջ մոլորություն է», – ասել է Մեդվեդեւը: ՌԴ նախագահի խոսքերով, մարդիկ Ռուսաստանում շատ են փոխվել: «Ես հիշում եմ ինձ 25 տարի առաջ: Ես ուրիշ մարդ էի, չնայած որ կարծում էի, թե կայացած անձնավորություն եմ, թեկնածուական աշխատանքը պաշտպանած, ուրիշ պատկերացումներ ունեի, միգուցե` իդեալիստական, որոշ դեպքերում էլ անփորձ էի»: Մեդվեդեւի խոսքերով, Ռուսաստանում նմանատիպ ճանապարհ են անցել մեծ թվով մարդիկ. «Ռուսաստանում գործընթացների ընկալման բարդությունը պետք է հաղթահարվի»:
