Այսօր լրագրողների հետ հանդիպմանը ԱԺ «Ժառանգություն» խմբակցության ղեկավար Ստեփան Սաֆարյանը անդրադարձավ «Ժառանգության»` շրջանառության մեջ դրած գաղտնազերծման օրինագծին:
Ստեփան Սաֆարյանը համարում է, որ սա մի հարց է, որի հետ կապված բոլոր քաղաքական ուժերը պետք է դիրքորոշում ունենան: «Արդյոք Հայաստանը կարո՞ղ է հանդուրժել այլ երկրների սպասավորներ, անձինք ունենալու արատավոր պրակտիկան»,- հռետորական հարց ուղղեց խմբակցության ղեկավարը:
Նա նշեց, որ այն երկրները, որոնք կիրառել են այս քայլը, այժմ նորմալ երկիր ունեն: Այդ երկրների ցանկում են Սերբիան, Լեհաստանը, Ալբանիան և այլն:
«Մեր կողմից մտածվել է չափազանց անվիճելի և համոզիչ մեխանիզմ, որը հնարավոր է` հղկման կարիք ունի, բայց կոնցեպտուալ առումով պահանջներին համապատասխանում է: Մենք ասում ենք, որ մինչև 1991թ. մարդիկ պետք է բացահայտվեն»,- մեկնաբանեց մեխանիզմը Սաֆարյանը`շարունակելով, որ գոյություն ունի գաղտնազերծման երկու եղանակ:
Առաջինը`այն մարդիկ, ովքեր աշխատել են օտարերկրյա կազմակերպությունների համար և գործակալական գործունեություն են ծավալել, դիմում են միջգերատեսչական հանձնաժողովին, տեղեկություններ են հայտնում այդ ծառայությունների գործունեության մասին:
Երկրորդն այն է, որ հանձնաժողովն ինքն է ուսումնասիրում և գցում այդ անձանց լյուստրացիայի տակ: Ուսումնասիրվողների ցուցակում են երկրի նախագահը, նախարարները, կուսակցականները և քաղաքական գործիչները:
Ուսումնասիրվում է կենսագրությունը, և եթե լինում են համագործակցություններ կասկածելի կազմակերպությունների հետ, միջգերատեսչական մարմինը դիմում է իրավասու մարմիններին և պաշտոնանկ անում տվյալ գործչին:
«Բավական է մենք հանդուրժենք հատուկ գործակալությունների գործակալներին մեր երկրում: Այդպիսի մարդիկ չեն կարող զբաղեցնել պաշտոններ և լինել պաշտոնատար անձինք»,- ընդգծեց Ս. Սաֆարյանը:
Անդրադառնալով ՀԱԿ Գուրգեն Եղիազարյանի արձագանքին` ասաց, որ ցինիզմ է համարում նրա արձագանքը:
«Օրը ցերեկով ցինիզմն այն աստիճանի կարող է լինել, որ նա նման կարծիք հայտնի: Մենք դավաճանե՞լ ենք հատուկ ծառայությունների գործակալական ցանցը: Սա հիմարություն է, որն ինձ մտահոգում է: Հնարավոր է` այսպես ինքնաբացահայտվում են: Մեր նպատակներից մեկն արդեն իսկ փաստորեն կատարման ճանապարհին է,»,- կարծիք հայտնեց քաղաքական գործիչը`հավելելով, որ հետամուտ են լինելու, որպեսզի լրատվական հանրույթը պարզի բոլոր քաղաքական ուժերի դիրքորոշումը:
Նա նաև նշեց, որ պետք չէ թերագնահատել այս օրենքի զարգացումը մեր երկրում. որ երկրները գնացել են այս ընթացակարգով` վերագտել են իրենց ինքնիշխանությունը:
Ստեփան Սաֆարյանը տեղեկացրեց, որ Րաֆֆի Հովհաննիսյանի հացադուլի պահանջներից մեկը այս ընթացակարգն էր, որը լինելու է կուսակցության այցեքարտերից մեկը:
«Ժառանգությունն» ակնկալում է այս ընթացակարգի շուրջը համագործակցության եզրեր գտնել այլ քաղաքական ուժերի հետ:
