Շվեյցարական Գրանջե քաղաքում անհայտ չարագործները խոզի մարմինը և չորս խոզերի գլուխ թաղել են մի վայրում, որտեղ ալբանական իսլամական համայնքը մտադիր էր կառուցել իսլամական երկհարկանի մշակութային կենտրոն, իսկ կողքին` մզկիթ:
Ինչպես հայտում է newsru.com լրատվական կայքը, ոստիկանությունը, որը հետաքննություն է սկսել դեպքի կապակցությամբ, ենթադրում է, որ չարագործները, իրականացնելով վիրավորական գործողություններ, հույս ունեին, որ սրբապղծված հողը չի կարողանա օգտագործվել շինարարության համար: Այդ կերպ նրանք պլանավորել էին խանգարել մզկիթի շինարարությանը:
Այժմ սրբապղծված հողում մզկիթի շինարարության հարց քննարկվելու է իսլամով զբաղվող մասնագետների կողմից: Ալբանական համայնքում արդեն հայտարարել են, որ, ամենայն հավանականությամբ, մզկիթը կկառուցվի նույն տեղում:
Հիշեցնենք, որ 2009 թվականի նոյեմբերին Շվեյցարիայում հանրաքվե էր անցկացվել, որով արգելվում է մինարեթների շինարարությունը իրենց երկրում, սակայն «մուսուլմանները նախկինի պես կարող են շարունակել դավանել իրենց կրոնը անհատական կամ համայնքային տեսքով»:
Շվեյցարիայի կառավարության դաշնային խորհուրդը (կառավարությունը) օրենսդրությամբ հաստատել էր համազգային հանրաքվեն, որի արդյունքում շվեյցարացիների 57.5 տոկոսը համաձայնել է Շվեյցարական ազգային կուսակցության նախաձեռնության հետ, որը որոշել էր կանխել «երկրի իսլամացումը»: Երկրի իսլամացման դեպքում «շարիաթը գործելու էր շվեյցարական օրենքի հետ զուգահեռ»:
Գրեթե ութմիլիոնանոց Շվեյցարիայում ապրում է 400 հազար մուսուլման, ընդ որում՝ նրանցից միայն 50 հազարն է համարվում իսկական հավատացյալ, այսինքն՝ նրանք պարբերաբար այցելում են մզկիթ: Երկրում գործում է չորս մզկիթ, ևս մեկը կառուցվում է: Ընդ որում՝ համաձայն լռության մասին օրենքի, մուեզինը իրավունք չունի մուսուլմաններին աղոթքի կանչել մինարեթներից:
