Դեկտեմբերի 13-ին Բրյուսելում տեղի է ունեցել ԵՄ Արևելյան գործընկերության արտգործնախարարների երկրորդ հանդիպումը, որին մասնակցեց ՀՀ պատվիրակությունը` ԱԳ նախարար Էդվարդ Նալբանդյանի գլխավորությամբ: Եվրոպական հանձնաժողովի փոխնախագահ, ԵՄ միասնական արտաքին և պաշտպանական քաղաքականության բարձր ներկայացուցիչ Քեթրին Էշթոնի նախագահությամբ անցած նիստին ներկա էին Արևելյան գործընկերության ծրագրում ընդգրկված վեց պետությունների և ԵՄ քսանյոթ անդամ երկրների արտաքին քաղաքական գերատեսչությունների ղեկավարները, Եվրոպական Հանձնաժողովի և Եվրոպական Խորհրդի, Եվրոպական Խորհրդարանի բարձրաստիճան ներկայացուցիչներ: Արտգործնախարարները ամփոփեցին անցնող տարում համագործակցության նոր ձևաչափի շրջանակներում կատարված աշխատանքները և ուրվագծեցին ձեռնարկվելիք քայլերը, մտքեր փոխանակեցին Գործընկերության ներուժի առավել արդյունավետ կիրառման վերաբերյալ: Հանդիպմանը ելույթով հանդես եկավ ՀՀ արտգործնախարարը: «Ես ցանկանում եմ ընդգծել, որ Հայաստան-Եվրոպական Միություն հարաբերությունների շրջանակը և բնույթը վերջին տարիներին զգալիորեն ընդլայնվել է, իսկ Արևելյան գործընկերությունը այն բարձրացնում է որակական նոր մակարդակի»,- նշել է Էդվարդ Նալբանդյանը:
Նալբանդյանը կարևորել է Ասոցիացման համաձայնագրի կնքման վերաբերյալ բանակցությունների մեկնարկը և հաջող ընթացքը, նշելով, որ հուլիսից ի վեր տեղի են ունեցել բանակցությունների երկու փուլ և յոթ տեսակոնֆերանս, իսկ երկու օրից Երևանում տեղի է ունենալու բանակցությունների երրորդ փուլը: Էդվարդ Նալբանդյանը ընդգծեց նաև Հայաստանի շահագրգռվածությունը ակտիվորեն շարունակելու խորացված ու համապարփակ ազատ առևտրի գոտու ստեղծման ուղղված աշխատանքները:
Անդրադառնալով մուտքի արտոնագրային ռեժիմի ազատականացմանը, ԱԳՆ ղեկավարը նշել է, որ Հայաստանը պատրաստակամ է շրջանակային փաստաթուղթ ստորագրել արտոնագրային ռեժիմի դյուրացման և ռեադմիսիայի վերաբերյալ և ակնկալում է, որ այն հնարավորինս շուտ կկնքվի:
Էդվարդ Նալբանդյանն ընդգծել է, որ Արևելյան գործընկերության բազմակողմ հարթության շրջանակներում համագործակցությունը հատուկ ուշադրության է արժանի, և այդ ձևաչափով Հայաստանը առաջարկել է 2011թվականին մի քանի միջոցառում անցկացնել Երևանում:
Իր ելույթում ՀՀ արտգործնախարարը դրական է գնահատել Մարդու իրավունքների վերաբերյալ երկխոսությունը, որի շրջանակներում վերջին հանդիպումը տեղի ունեցավ նախորդ շաբաթ Բրյուսելում:
Անդրադառնալով հակամարտությունների հանգուցալուծմանը՝ Էդվարդ Նալբանդյանը, մեջբերելով ԵԱՀԿ Աստանայի գագաթաժողովի հռչակագրում ամրագրված դրույթը, որ հակամարտությունները պետք է լուծվեն խաղաղ միջոցներով և գործող ձևաչափերում` միջազգային իրավունքի նորմերի և սկզբունքների հիման վրա, շեշտեց, որ կարգավորմամբ զբաղվող միջազգային մանդատ ունեցող կառույցները կուտակել են լուրջ փորձառություն և կարող են ծառայել որպես կարգավորման գործուն և արդյունավետ մեխանիզմ:
ԵՄ երկրների արտգործնախարարներն իրենց ելույթներում գոհունակություն են հայտնել Արևելյան գործընկերության շրջանակներում ծավալվող համագործակցության վերաբերյալ, և նախանշեցին հաջորդ տարվա անելիքները:
Արտգործնախարարներն անդրադարձան հաջորդ տարվա մայիսի 27-ին Բուդապեշտում կայանալիք Արևելյան գործընկերության գագաթաժողովի նախապատարաստական աշխատանքներին:
