Միջպետական հարաբերությունները մարդկանց շատ ավելի քիչ են հետաքրքրում, քան ուրիշ հարցեր՝ ում հետ, ոնց հանդիպեց: Այսօր ասուլիսում քաղաքագետ Մանվել Սարգսյանը կարծիք հայտնեց, որ դա բնական է, որովհետև հիմնականում ՀՀ-ում իշխանական խնդիրները, այն էլ՝ այս պահին, կապվում են ՌԴ-ի հետ: Նրա խոսքով՝ արդեն մի քանի ամիս է՝ խոսում են Պուտինի վերադարձից ու թե Հայաստանում ով կվերադառնա, կամ ՌԴ-ն ում կպաշտպանի:
Քաղաքագետ Ալեքսանդր Մարգարովի տեսակետով՝ Սերժ Սարգսյանի ՌԴ կատարած պետական այցի ժամանակ ուշագրավն այն էր, որ եթե մինչ այդ ուշադրություն էին դարձնում ռազմական, քաղաքական և ռազմավարական հարցերի շուրջ ձեռք բերվող պայմանավորվածություններին, այս անգամ ավելի շեշտադրվեց տնտեսական և հումանիտար բաղադրիչը:
«Ցույց տրվեց, որ, բացի դաշնային և ռազմական հարաբերությունների առկայությունից, տեսնում ենք, որ կոնսոլիդացիոն գործընթացը երկու երկրների տարբեր մակարդակներում շարունակվում է։ Նաև տարածաշրջանային քաղաքականության մեջ Ռուսաստանը շարունակում է հանդես գալ որպես ուժերից մեկը, որն ունի իր հետաքրքրություններն այս տարածաշրջաներում և նպատակ չունի դուրս մնալ տարածաշրջանում տեղի ունեցող զարգացումներից»,- ասաց Ա. Մարգարովը:
Անդրադառնալով ներքաղաքական խնդիրներին՝ Մ. Սարգսյանը նշեց, որ բոլորը խոսում են ինչ-որ առանցքի շուրջ կոնսոլիդացումից, սակայն իրականում բոլորը 20 տարի նույն ցուցակն են ներկայացնում՝ պետք է լավ լինենք, օրենք լինի, արդարադատություն լինի, բայց բոլորն էլ խախտում են դա, և՝ հենց ստվերային պայմանավորվածությունների միջոցով, ինչը հակասահմանադրական է:
Ա. Մարգարովի խոսքով՝ պայմանավորվածություններ կարող են ձեռք բերվել տարբեր նպատակներով՝ ծրագրային, ռազմավարական, և, ի տարբերություն Ուկրաինայի, ՀՀ-ում կոալիցիոն պայմանավորվածությունները հակասահմանադրական չեն:
