Հայաստանի արտգործնախարարությունից «Առաջին լրատվական»-ին տեղեկացնում են, որ այսօր` հոկտեմբերի 26-ին, արտգործնախարար Էդվարդ Նալբանդյանն ընդունել է Փարիզի քաղաքապետ Բերտրան Դելանոեին:
Ողջունելով հյուրին՝ ՀՀ ԱԳ նախարարը նշել է, որ այս վերջին մեկ ամիսը Հայաստանի համար նշանավորվել է իբրև հայ-ֆրանսիական բարեկամության ամիս, որն սկսվել է ՀՀ նախագահի պաշտոնական այցելությամբ Փարիզ, Ֆրանսիայի նախագահի Հայաստան կատարած պետական այցով և ավարտվում է ֆրանկոֆոն քաղաքապետերի միջազգային կազմակերպության գլխավոր ասամբլեայի` Երևանում անցկացվող տարեկան նիստով:
Նախարար Նալբանդյանը շնորհակալություն է հայտնել պարոն Դելանոեին վերջին տասնամյակի ընթացքում համատեղ իրականացրած ծրագրերի համար` մասնավորապես կարևորելով Ֆրանսիայի մայրաքաղաքի սրտում՝ Ելիսեյան դաշտերի հարևանությամբ Կոմիտասի արձանի բացումը, Երևանի պուրակի բացումը, ինչպես նաև Փարիզի քաղաքապետարանում արդեն ավանդական դարձած ամենամյա ընդունելությունը` ի հիշատակ Հայոց ցեղասպանության զոհերի, Փարիզի քաղաքապետարանի ակտիվ մասնակցությունը Ֆրանսիայում Հայաստանի տարվա միջոցառումներին։
«Այս ամենն իրագործվել է Ձեր քաղաքապետության օրոք, և Երևանում հիշում են այդ մասին»,- ընդգծել է Հայաստանի արտաքին գերատեսչության ղեկավարը։
Շնորհակալություն հայտնելով ընդունելության և երախտիքի խոսքերի համար` Բերտրան Դելանոեն ասել է, որ ուրախությամբ է այցելում բարեկամ Հայաստան և վստահ է, որ այցելության ընթացքում ձեռք բերված պայմանավորվածությունների իրագործումը առավել կխորացնեն կապերը երկու մայրաքաղաքների, երկրների ու ժողովուրդների միջև։
ՀՀ ԱԳ նախարարն ու Փարիզի քաղաքապետը երկուստեք կարևորել են ֆրանկոֆոն քաղաքապետերի միջազգային կազմակերպության գլխավոր ասամբլեայի` Երևանում անցկացվող տարեկան նիստը` վստահություն հայտնելով, որ այն նաև մեծապես ամրապնդելու է Հայաստանի դիրքերը ֆրանկոֆոն երկրների ընտանիքում։
Հանդիպմանը քննարկվել են տարածաշրջանային և միջազգային օրակարգի մի շարք հարցեր։
