Ոչ թե համաշխարհային տնտեսական ճգնաժամի երկրորդ փուլ է, այլ` անկայունության փուլ, որը կտևի 10-25 տարի, որի ժամանակ հնարավոր են բախումներ՝ նույնիսկ քաղաքակրթությունների միջև: Նման տեսակետ այսօր ասուլիսում հայտնեց ՀՀ նախկին վարչապետ Հրանտ Բագրատյանը: Ըստ նրա՝ շատերն ուզում են կանգնեցնել Չինաստանի տնտեսական աճը, և դրա համար արվում է ամեն ինչ, կլինեն երկրներ, որ դրոշակակիր կլինեն այս գործում, կլինեն երկրներ, որ մանրադրամի դեր կխաղան: Արևմուտքին պետք է ամեն ինչ անել չինական աճը կանգնեցնելու համար:
Թե ինչ պետք է անի այս պայմաններում Հայաստանը, ըստ Բագրատյանի՝ դա գրված է ՀԱԿ-ի «100 քայլ»-ում: Նա թվարկեց առաջին անհրաժեշտ քայլերը` պետք է ստերիլիզացնել դրսից եկող օգնությունը` 2-3 մլն դոլար տրանսֆերտներն արհեստականորեն պահոմ են դրամի կուրսը, այդ միջոցներով ստեղծել կայունացնող հիմնադրամ, պետք է իջեցնել վարկավորման տոկոսադրույքը, երբեք չի կարելի թույլ տալ դրամի արժևորում` դրամը հանգիստ պետք է արժեզրկվի: «96-ին արտահանումը եղել է ավելի շատ, քան հիմա, բանակին ավելի շատ փող էր տրվում՝ դոլարային արտահայտությամբ»,- ասաց Հ. Բագրատյանը ու շարունակեց. «Պետք է անցում կատարել պրոգրեսիվ հարկային համակարգի, բանկերը պետք է հարկվեն, հանքերը` վաճառել, իսկ հանքաքարի գինը պետք է ԱԺ-ն սահմանի, պետք է կոնսոլիդացնել հանրապետության բյոււջեն, որ վարչապետը երաշխիքներ չտա, չի կարելի, որ ԿԲ-ն արտաքին պարտք վերցնի: Ըստ Բագրատյանի՝ դրանք օրենսդրական փոփոխություններ են պահանջում: Առաջնահերթ պետք է նաև բացառել կառավարության որոշմամբ հարկային արտոնություններ տալը, բացառել բանկերում վատ վարկերի դուրս գրումը` վատ վարկեր դուրս գրելը հարկային արտոնություն է:
Հ. Բագրատյանի խոսքով՝ խիստ կարևոր է նաև մոնոպոլիաների կարգավորումը` 20% շահութահարկի փոխարեն՝ մենաշնորհները 70% պետք է հարկվեն:
«Երկրի պահուստները որտե՞ղ են, ինչո՞ւ ԱԺ-ն չի հաստատում: Ես գլխի եմ ընկել, բայց չեմ ասում: Անհասկանալի է, թե ոնց է գյուղտնտեսական ավարտած մարդը ԿԲ նախագահ դարձել»,- նշեց Հ. Բագրատյանը` ընգծելով, որ առաջիկայում ոչ մի լավ բան չի լինելու:
