Ադրբեջանական Salam News գործակալության փոխանցմամբ՝ Ադրբեջանի արտգործնախարար Էլմար Մամեդյարովը մեկնաբանել է ԵԱՀԿ Մինսկի խմբի համանախագահների առաջիկա տարածաշրջանային այցը.
«ԵԱՀԿ Մինսկի խմբի համանախագահները Բաքու կժամանեն արդեն հաջորդ շաբաթ։ Ամենայն հավանականությամբ, դա տեղի կունենա շաբաթվա սկզբին։ Համանախագահների տարածաշրջանային այցի հիմնական նպատակը Ղարաբաղյան հակամարտության կարգավորման վերաբերյալ տարվող բանակցություններում բաց մնացած հարցերի որոշակիացումն է և դրանց ուղղությամբ աշխատանքների շարունակումը։ Մադրիդյան սկզբունքներն իրավական փաստաթուղթ են, քննարկվելու են միայն այն հարցերը, որոնց շուրջ ցայժմ պայմանավորվածություն ձեռք բերված չէ։
Մենք պետք է արագացնենք բաց մնացած հարցերի շուրջ աշխատանքները։ Ադրբեջանը նախկինի նման ներկայումս նույնպես ցանկանում է, որ մեկնարկեն խաղաղության մեծ պայմանագրին առնչվող աշխատանքները։ Մենք կարծում ենք, որ ժամանակ չվատնելու համար պետք է աշխատանքներ սկսել խաղաղության մեծ պայմանագրի ուղղությամբ։ Ցայժմ համաձայնեցված հարցերի հիման վրա կարելի է սկսել խաղաղության մեծ պայմանագրի նախապատրաստումը»։
Հիշեցնենք, որ այս տարվա հուլիսի կեսերին ռուս փորձագետ Ստանիսլավ Տարասովը նկատել էր. «Ադրբեջանի ներկայիս գործողություններում նշմարվում է ինչ-որ տրամաբանություն՝ համեմատած նախորդ տարիների հետ։ Բաքուն փորձում է դուրս գալ «մադրիդյան թակարդից», քանի որ այդ ճանապարհին առաջին քայլը հանգեցնում է քաղաքական-դիվանագիտական գործընթացի փլուզմանը, որի ելքն ավարտվում է Ղարաբաղի անկախության ճանաչմամբ։ Այստեղից էլ ի հայտ է գալիս դեռևս չհամաձայնեցված դետալներ ունեցող «հիմնարար սկզբունքների» վրա տարվող աշխատանքները խաղաղության համաձայնագրի նախապատրաստման աշխատանքներով փոխարինելու Բաքվի փորձը։
«Ինտերֆաքսին» Մամեդյարովը հայտարարել էր. «Եկե՛ք միանգամից սկսենք աշխատել խաղաղության համաձայնագրի վրա և ողջ աշխարհին ցույց տանք մեր քաղաքական կամքը, որ մենք պատրաստ ենք անմիջապես աշխատել իրավաբանորեն պարտադրող խաղաղության համաձայնագրի և ոչ թե քաղաքական փաստաթղթի վրա»։ Դա նշանակում է, որ Բաքուն սկսել է Մադրիդյան սկզբունքները որակել որպես «քաղաքական փաստաթուղթ»։
Բայց չէ՞ որ դրանք ի սկզբանե այդպիսին են հանդիսացել, քանի որ դրանցում գոյություն չունի ո՛չ Հայաստանի, ո՛չ էլ Ադրբեջանի ստորագրությունը։ Սակայն հենց Մադրիդյան սկզբունքներն են Ադրբեջանին հանգեցրել մեծ տերությունների հետ ընդհանուր կոշտ «դիվանագիտական գրկախառնության»՝ նրան գործնականում զրկելով դաշնակիցներից»։
