Հոկտեմբերի 14-29-ը Երևանում կանցկացվի Վահրամ Փափազյանի անվան թատերական փառատոնը, որի բացումը տեղի կունենա այսօր Գաբրիել Սունդուկյանի անվան ազգային ակադեմիական թատրոնում: «Ռուսական մշակույթի սեզոնների» շրջանակում այսօր հանդիսատեսին կներկայացվի Մոսկվայի Չեխովի անվան միջազգային թատերական փառատոնի և Լոնդոնի «Չիկ բայ ջաուլ» թատրոնի համատեղ նախագիծը: Այդ մասին այսօր լրագրողների հետ հանդիպմաը տեղեկացրեց մշակույթի նախարար Հասմիկ Պողոսյանը:
Վ. Փափազյանի անվան Շեքսպիրյան միջազգային փառատոնի նախագահ Հակոբ Ղազանչյանն էլ ուրախությամբ նշեց, որ մեզ մոտ եկել է աշխարհահռչակ ռեժիսոր, Մոսկվայի Ա. Պ. Չեխովի անվան միջազգային փառատոնի գլխավոր տնօրեն, Ռուսաստանի նախագահին կից մշակութային խորհրդի նախագահության անդամ Վալերի Շադրինը:
«12-րդ գիշեր» ներկայացումն այս տարի փառատոնի այցեքարտն է»,- ասաց Շադրինը:
Նրա խոսքով`ինքը վաղուց էր երազում ներկայացում բեմադրել Հայաստանում, և շնորհակալություն հայտնեց Հ. Պողոսյանին ու Հ. Ղազանչյանին` հրավիրելու համար: «Ներկայացման մեջ բոլոր դերակատարները տղամարդիկ են, մնացածը հանդիսատեսն այսօր կարող է տեսնել արդեն բեմում»,- տեղեկացրեց նա` կատակով նշելով, որ 13 տղամարդ խաղալու են առանց կեղծամների, կրունկներով կոշիկներ են կրելու ու հանդես են գալու առանց գրիմի:
«12-րդ գիշերը» Մոսկվայում բեմադրել է հայտնի բեմադրիչ Դեկլան Դոնելլանը ռուսաստանցի հայտնի դերասանների օգնությամբ:
«Ռուսական մշակույթի սեզոնների շրջանակում» Երևան են ժամանել Չեխովի անվան միջազգային փառատոնի աջակցման հիմնադրամի գործադիր տնօրեն Կարինա Ծատուրովան, թատերական միությունների միջազգային համադաշնության նախագահի օգնական Սերգեյ Մայիլովը դերասաններ Ալեքսեյ Ֆեկլիստովը, Միխայիլ Ժիգալովը, Իգոր Յասուլովիչը:
